Еліміз швейцариялық вагондардың біреуін 1,18 млрд теңгеден сатып алмақ

АСТАНА. KAZINFORM – Еліміз швейцариялық плацкарт вагондардың біреуін 1,18 млрд теңгеден сатып алмақ. Бұл туралы Мәжілістегі елдің көлік-логистикалық әлеуетін дамытуға арналған Үкімет сағатында депутат Нұртай Сабильянов айтты.

- Бүгінгі күні жолаушы вагондарының паркіне байланысты үлкен мәселе бар. Қазір 2 667 бірлік вагон бар екен. Оның ішінде: 1012 бірлік, яғни вагондардың 39 пайызы 28 жылдан астам уақыт бойы пайдаланылып келе жатқан ескі. Өздеріңіз білетіндей, 2012-2022 жылдар аралығында «Тальго» шығарған 676 жолаушы вагоны сатып алынды. Оның бағасы 350 млн теңгеден 650 млн теңге аралығында болды. Қазір бұл зауыт жабылды, - деді Мәжіліс депутаты.

Оның атап өтуінше, содан кейін «ЗИКСТО» жауапкершілігі шектеулі серіктестігінен 2023-2024 жылдары 750 млн теңгеден 850 млн теңгеге дейінгі бағамен 150 бірлік жолаушы вагоны сатып алынды.

- Қазіргі уақытта «Штадлер Қазақстан» жауапкершілігі шектеулі серіктестігі швейцариялық компаниясымен 557 вагон сатып алу бойынша келіссөздер жүргізіліп жатыр. Плацкарт вагон бірлігінің бағасы – 1,18 млрд теңге. Вагондар мәселесін халық жиі көтереді. Санитариялық жағдайы жоқ. Сондықтан, ұлттық тасымалдаушы жолаушыларды жаңа жайлы вагондармен қамтамасыз етуге тиіс, - деді Нұртай Сабильянов.

Айта кетейік, Мәжіліс депутаты теміржол көлігімен тасымалды тежейтін факторларды атады.