Елімізде адвокаттық мантия бекітілді

АСТАНА. KAZINFORM — Қазақстанда адвокаттардың кәсіби формасы бекітілді.

Республикалық адвокаттар алқасының төралқасы адвокаттық мантия мен оның сипаттамасын бекітті. Бұл құқық «Адвокаттық қызмет және заң көмегі туралы» Қазақстан Республикасы Заңының 33-бабының 6-тармағында көзделген. 

Мантия — адвокаттың басқа жеке субъектілерден ерекшеленетін ерекше қоғамдық-құқықтық мәртебе белгісі. Адвокат кәсіби қызметін жүзеге асыруға кедергі келтіретін қудалаудан, тінтуден және басқа да араласулардан қорғайтын ерекше кәсіби артықшылыққа ие.

— Мантия кию — міндет емес, құқық. Әрбір адвокат сот отырыстарында мантия киюдің қажеттілігін өзі шешуге құқылы. Сонымен қатар, мантияны кәсіби мәртебеге сай салтанатты іс-шараларда да киюі мүмкін. Мантияның формасы кең талқылау нәтижелері бойынша таңдалады. 2024 жылы адвокаттардың III республикалық спартакиадасы аясында адвокаттық мантия жобаларының алғашқы тұсаукесері өтті. Сондай-ақ, анонимді сауалнама жүргізілді, оған ұсынылған модельдер туралы өз пікірлерін білдірген 300-ге жуық адвокат қатысты, — делінген республикалық адвокаттар алқасының баспасөз қызметі таратқан хабарламада.

Алдын ала талқылау қорытындысы бойынша адвокаттар төралқасы бүкіл адвокат қауымдастығы арасында кеңірек және ашық сауалнама жүргізу туралы шешім қабылдады. 

— Оған еліміздің барлық өңірінен 3 мыңнан астам адвокат қатысты. Дауыс беруге үш қазақстандық дизайнердің мантия үлгілері шығарылды. Сауалнама нәтижелері бойынша, сондай-ақ аумақтық алқалар ұсынған ұстанымдарды ескере отырып, төралқа мантия моделін бекітті, — деді республикалық адвокаттар алқасының төрағасы Айдын Бикебаев. 

Мантияның негізгі элементтері:

● Қара мата, аспан-көгілдір түсті жағасы бар, бұл түс Қазақстан туының түсін бейнелейді; 
● Мантияның жағасы мен сәндік ленталарында «Қорғау» ұлттық өрнегі қолданылған, бұл «қорғау» немесе «тұмар» дегенді білдіреді (Символ мемлекеттік кеңесші Ерлан Карин құрастырған «OIU Qazaq Design» жинағынан алынды);
● Мантияның ашық фасоны — түймесіз және бекіткішсіз — адвокаттың еркіндігі мен тәуелсіздігін бейнелейді.
● Өрнектері бар симметриялы көк ленталар теңдікті, тепе-теңдікті және әділеттілікті білдіреді.

Әр адвокат мантияны кез келген тігін шеберханасында тігуге құқылы. Жасау процесі ережеде көрсетілген сипаттамаға сәйкес жүзеге асырылады. 

Адвокаттық мантияны кию тәртібі мен сипаттамасы туралы бекітілген ережемен республикалық адвокаттар алқасының сайтында advokatura.kz танысуға болады. 

Еске салайық, жыл басында елімізде адвокаттардың қызметі қанша тұратыны туралы шолу жасаған едік.