Елімізде электронды білезіктерді қолдану жағдайларының саны артып келеді
АСТАНА. KAZINFORM – Елімізде соттар қамауға алудың балама бұлтартпау шараларын кеңінен қолдана бастады. Бұл туралы Жоғарғы сот төрағасы Асламбек Мерғалиев мәлім етті.
- Халықаралық стандарттарға сәйкес, сотты күтіп тұрған адамдарды қамауға алу жалпы ереже болмауы керек. Қылмыстық-процестік кодексте қамауға алудан гөрі қатаңырақ бұлтартпау шарасын таңдау көзделген. Дегенмен, елімізде сотқа дейін қамауға алынғандардың саны жоғары болып қалуда – жыл сайын шамамен 11 мың адам. Олардың үштен екісі ғана нақты бас бостандығынан айыруға сотталады, - деді ол елордада өткен «Жүргізілген сот реформасының өзекті мәселелері» тақырыбындағы дөңгелек үстел барысында.
Жоғарғы сот төрағасы тергеу соттары тергеудің жетегінде жүреді және қамауға алуға санкция береді деген заңгер қауымның сынымен ішінара келісті.
- Қолданылған бұлтартпау шараларын соттың санкциясымен салыстыратын болсақ, қамауға алу үлесі - 95, үйқамаққа алу - 4, кепілдік одан да төмен – 1 пайыз. Өткен жылы тергеу органдары 639 адамға үйқамаққа алу, 34 күдіктіге кепілдік беру туралы өтінішхат білдірсе, соттар қамауда ұстауға санкция беруден бас тарта отырып, тиісінше 2 786 және 283 адамға үйқамақ және 283 адамға кепілдік беруді өз бетінше таңдаған, - деді Жоғарғы сот төрағасы.
Асламбек Мерғалиевтің атап өтуінше, Жоғарғы соттың бастамасымен қолға алынған электронды бақылау құралдарын қолдануды кеңейту жобасы оған маңызды серпін берді. Электронды білезіктерді қолданғандар саны 14 есеге жуық (68-ден 954-ке дейін) артты.
- Мемлекет басшысының тапсырмасы бойынша Жоғарғы сот электронды бақылау құралдарын қолдану практикасын кеңейту жөнінде ұсыныстар дайындады. Пробациялық бақылаудағы сотталғандарға қатысты тиісті технологиялар белсенді қолданылады. Қылмыстық атқару жүйесінде сотталғанды 2 метрге дейінгі дәлдікпен тұрақты бақылауға мүмкіндік беретін 2,5 мың жинақ бар, - деді ол.
Биылғы жылдың 10 айында ғана соттар заң бұзған адамдарға 505 рет электронды білезік тағу шарасын қолданғаны туралы жаздық.
