Еліміздегі жеңіл автокөліктердің 40%-дан астамы әбден ескірген – ресми статистика
АСТАНА. KAZINFORM - Қазақстандағы жеңіл машиналардың басым бөлігі 20 жылдан астам уақыт бұрын жасалған. Бұл жөнінде «Қазақстанның автокөлік одағы» ЗТБ президенті Анар Мақашева Астанада өткен баспасөз конференциясында айтты.
Ол 2025 жылдың 1 қыркүйегіндегі жағдай бойынша статистиканы келтірді.
Ресми дерекке сенсек, Қазақстанда 5,9 млн жеңіл көлік тіркелген. Соның 41,5%-ы, яғни 2,44 миллионы кемінде 20 жыл бұрын шыққан. Ал 1 425 231 көлік (24,2%) 10-20 жыл бұрын, 606 589 көлік (10,3%) 7-10 жыл бұрын, 1 014 059 көлік (17,2%) 3-7 жыл бұрын, 399 475 көлік (6,8%) соңғы 3 жыл ішінде өндірілген.
– Байқасаңыз, еліміздегі автокөліктердің ішінде 1-7 жыл шыққандары едәуір көп. Бұл отандастарымыз соңғы бірнеше жылда жаңа көлік мінуге ұмтылғанын білдіреді. Алайда жеңіл көліктердің 41,5%-ы 20 жылдан астам уақыт бұрын жасалған. Бұл көңіл көншітерлік жағдай емес. Сондықтан біздің басты мақсаттарымыздың бірі – қазақстандық автокөлік паркін бірте-бірте жаңарту, – деді А. Мақашева.
Айта кетейік, бұған дейін биыл елімізде 209 мың автокөлік жасалатынын жазғанбыз.
