Елордада ақылы тұрақтарды әкімдік қарамағына қайтару процесі қалай болады

АСТАНА. KAZINFORM – Елорда әкімінің орынбасары Ерсін Өтебаев елордадағы ақылы тұрақтарды басқаруды мемлекеттің қарауына қайтаруға қатысты түсінік берді.

— «Астана тұрақ кеңістігі» атты жеке серіктес болды. Қазір олармен келісімшартты бұзу туралы құжаттарға қол қойылды. Енді (ақылы тұрақтардың) мемлекетке өтуі рәсімдері іске асырылып жатыр, — деді Ерсін Өтебаев Парламент Мәжілісінде тілшілер сұрағына жауап бере отырып.

Оның айтуынша, қазір ақылы тұрақтарға қатысты мүлікті түгендеу жұмыстары істеліп, оны әкімдіктің қабылдауы іс-шаралары жүзеге асады.

— Бастапқыда ақылы тұрақтарға әкімдік ешқандай қаражат жұмсаған жоқ. Тұрақ ақысы (1 сағатына) 100 теңге болса, оның 25 пайызы мемлекетке түсетін, ал қалған 75 пайызын заңды тұлға алатын. Айыппұл толығымен мемлекетке түседі, — деді әкімнің орынбасары.

Бұдан бұрын хабарланғандай, бүгін Мәжілістің жалпы отырысында депутат Бақытжан Базарбек елордадағы ақылы тұрақты басқаруды мемлекеттің қарауына қайтаруға қатысты пікір айтты.