Елордада Алматының тарихи фотосуреттерінің үш күндік көрмесі ашылды
АСТАНА. KAZINFORM – Елордада ҚР Президенттік орталығында Алматының тарихы және тәуелсіздіктің алғашқы жылдары тақырыбындағы үш күндік фотокөрме жұмысын бастады.
«Объектив және экран жүзінде: Алматы — Тәуелсіздіктің алтын бесігі» атты фотокөрмеге қаланың сонау 1920-30 жылдардағы фотолары да қойылған.
ҚР Орталық кинофотоқұжаттар және дыбыс жазбалар мұрағатының директоры Ілияс Ысқақовтың айтуынша, Тәуелсіздік күні қарсаңында осындай мәдени-ақпараттық шараның ұйымдастырылуында терең мән бар.
«Алматының егемен ел болып қалыптасуымыздағы рөлі үлкен. Ол қала біздің тәуелсіздік алғаннан кейінгі алғашқы астанамыз ғана емес. Мемлекетіміздің қалыптасуы сол жерде басталды. Зиялы қауым, білімді жастар – бәрі сол Алматыда өсіп-өнді, дамыды, жетілді. Тәуелсіздікті алғаш жариялаған, тұңғыш Конституциямызды қабылдаған шаһар. Сондықтан осындай маңызды мереке қарсаңында ол қаланың өткенін тағы бір еске алып, мән-маңызын тереңірек түйсініп қою – біз үшін үлкен борыш», - деді ол.
ҚР Республикасының тұңғыш Президенті Нұрсұлтан Назарбаевтың ант қабылдау рәсімін де, Банкнот фабрикасының ашылуында, алғашқы Конституцияны ресми ұсыну салтанаты кезінде, Мемлекеттік Тудың эскизін талқылау кезінде түсірілген фотоларды да көрмеден таба аласыз.
Нұрсұлтан Назарбаевтың ант қабылдау рәсімі
Банкнот фабрикасының ашылуы
Мемлекеттік Тудың эскизін талқылау кезі
Конституцияны ресми ұсыну салтанаты
Әйгілі «Қазақстан» қонақ үйінің салынып жатқан сәтін таспалаған фотоны да тамашалауға болады.
Әйгілі «Қазақстан» қонақ үйі салынып жатқан сәт. 1976 ж. Марунин.
Көрме – тегін. Алдағы үш күнде қала тұрғындары мен қонақтарына арнайы экскурсия жетекшілері қызмет етеді.
