Елордада Момышұлының кітаптары, хаттары мен карталары қойылған көрме ашылды
АСТАНА. KAZINFORM – Астанада Бауыржан Момышұлының кітаптары, хаттары мен карталары көрмеге қойылды.
— Бүгінгі көрмеге музейімізден Бауыржан Момышұлының күнделігін және жауынгерлік картасының түпнұсқасын алып келіп отырмыз. Ол кісі 1945 жылы қаңтар айынан бастап 9-гвардиялық дивизия командирі болды, ақпан-наурыз айларында ұрыстарға қатысты. Бұл картаны сол кезде сызған екен. Одан бөлек кітаптарын, күнделігін ұсындық. Бауыржан атамыз қандай қиын кездерде де күнделік жазуын тоқтатпаған. Кейін сол күнделіктерді негізге ала отыра 20-дан астам кітап жазып шыққан. Соғыс жылдары жалпы 38 күнделікті толтырып біткен екен. Соның біреуін бүгін көрмеге әкеліп отырмыз, - деді Ұлттық әскери-патриоттық орталығы бастығының орынбасары, Әскери-тарихи музейінің бастығы майор Дәулет Қадыров.
Көрмеге сондай-ақ Б. Момышұлының жеке күнделігі, 1955-1956 жылдары Калинин қаласында пайдаланған блокноты, портреті, фотосуреттері және батырдың ерлігі туралы жазылған көркем туындылар мен Екінші дүниежүзілік соғыс жайлы тарихи кітаптар қойылды.
— Бұл көрмеге Бауыржан Момышұлының 32 томдық еңбегі қойылды. Бұрын 30 том болатын, кейінгі жылдары толықтырылып, 32 томға жеткізілді. Соның 6 томы өзі жазған хаттардан тұрады. Қазақ әдебиетінде эпистолярлық жанр кенже дамыған. Ал Бауыржан Момышұлы осы жанрды шыңдаған жазушылардың бірі. Оған осы 6 томға жететін хаттары дәлел. Оның ішіне 1930 жылдан бастап өмірінің соңына дейін жазылған хаттар жинақталған, - дейді Қолжазбалар және сирек кітаптар ұлттық орталығы Ғылыми зерттеу жұмыстарын ұйымдастыру бөлімінің жетекші маманы Гүлсім Бисенова.
Қолжазбалар және сирек кітаптар ұлттық орталығында ашылған көрмені ұйымдастыруға ҚР Қарулы Күштері Ұлттық әскери-патриоттық орталығы атсалысқан. Шара Ұлы Жеңістің 80 жылдығы, даңқты қолбасшы, әскери қайраткер, жазушы, Кеңес Одағының Батыры Бауыржан Момышұлының туғанына 115 жыл толуына орай ұйымдастырылды.
Айта кетейік, бұған дейін елордада Бауыржан Момышұлының соғыста қолданған заттары қойылған көрме өткен еді.
