Елордада орталық атқарушы органдардың жұмыс уақыты өзгеруі мүмкін

АСТАНА. KAZINFORM — Астана қаласы әкімдігінде жұмыс уақытын өзгерту мәселесі көтерілді.

Қалалық мәслихаттың кезекті сессиясында Астана қаласының көлік жүйесін дамыту перспективалары қаралды. 

— Бүгінде біз қарастырып жатқан тағы бір мәселе, жұмыс уақытын өзгерту. 2017 жылдан бастап әкімдіктің жұмыс уақыты таңғы сағат 08:30–ға ауыстырылған. Осы орайда орталық атқарушы органдардың жұмыс уақытын өзгерту мәселесін Үкімет деңгейінде көтеруді жоспарлап отырмыз. Өзгеріс жарты сағатқа ма, бір сағатқа ол мәселені біз әлі талқылаймыз. Бұл мәселені білім беру және денсаулық сақтау нысандарымен бірлесе қарастырамыз, — деді елорда әкімінің орынбасары Ерсін Өтебаев қалалық мәслихат отырысында баяндама жасап.

Елорда әкімі орынбасарының уәжіне сүйенсек, жұмыс уақытын өзгерту шарасы жолаушылар ағынын азайтуға септігін тигізеді, сәйкесінше кептеліс мәселесі сәлде болса шешімін таппақ. 

— Қоғамдық көлікті пайдаланатын әр жолаушы жұмысқа жарты сағат ерте шығуға тура келеді, ал жүргізушілер де сәйкесінше қозғалысты реттеп, жол қозғалысын бірқалыпты етуге мүмкіндік алады. Алайда мәселені әлі де жан-жақты пысықтау қажет, сіздермен бірлесіп талқылап, тиімді шешім қабылдаймыз. Бұл ең жылдам және оң өзгерістердің бірі болатынына сенімдіміз, — дейді ол.

Айта кетсек, Мемлекет басшысы таяуда өткен ұлттық құрылтайда уақыт белдеуіне қатысты пікірталасты доғару қажеттігін айтты. 

Еске сала кетейік, Шығыс Қазақстан облысындағы Катонқарағай ауданында жұмыс уақыты бір сағатқа кері шегерілді. 

Кейін Шығыс Қазақстанның тағы төрт ауданында жұмыс уақыты бір сағатқа кері шегерілді.