Ердоған Қырғызстанға мемлекеттік сапармен барды

БІШКЕК. КAZINFORM – Түркия Президенті Режеп Тайип Ердоған 4 қараша күні мемлекеттік сапармен Бішкекке барды. Оны «Манас» халықаралық әуежайында президент Садыр Жапаров күтіп алды. Бұл туралы мемлекет басшысының баспасөз қызметі хабарлады, деп жазады 24.kg.

Мәртебелі қонақтарды қарсы алуда екі елдің туы ілініп, кілем төселіп, ұлттық киіз үй түріндегі инсталляция орнатылып, құрметті қарауыл жасақталды.

Режеп Тайиып Ердоғанды қарсы алған ұлттық киім киген бойжеткендер оған гүл, бауырсақ, бал сыйлады. Түрік басшысын қырғыз елінің құсбегілері айрықша қызықтырғандай көрінді.

Президенттер мен олардың жұбайлары қырғыз және түрік музыкалық туындыларын орындаған қырғыз өнерпаздарының қатысуымен өткен концерттік бағдарламаны тамашалады.

– Сапар барысында Қырғыз Республикасы мен Түркия басшыларының шағын құрамдағы келіссөздері, сондай-ақ олардың төрағалығымен Стратегиялық ынтымақтастық жөніндегі Жоғарғы кеңестің алтыншы отырысы өтеді, онда Қырғызстанның өзекті мәселелерін талқылау жоспарлануда, – делінген хабарда.

Сапар қорытындысы бойынша екі ел арасындағы стратегиялық ынтымақтастықты кеңейтуге және мемлекетаралық қатынастарды одан әрі нығайтуға бағытталған бірқатар екіжақты құжаттарға қол қою жоспарлануда.

Осыған дейін Ердоғанның ресми сапармен Қырғызстанға баратыны туралы жаздық.