Ереванда «Қазақстан-Армения: бүгіні мен болашағы» атты дөңгелек үстел отырысы өтті
ЕРЕВАН. KAZINFORM — Ереванда өткен дөңгелек үстелге қатысушылар Қазақстан мен Армения арасындағы қарым-қатынастардың қазіргі жай-күйі туралы өз бағаларын, сондай-ақ екіжақты қарым-қатынастарды дамыту перспективалары туралы пікірлерімен бөлісті, деп хабарлайды Kazinform агенттігінің меншікті тілшісі.
Шара Қазақстан мен Армения арасындағы достық пен ынтымақтастық туралы шарттың 25 жылдығына арналды.
Ереванда өткен «Қазақстан-Армения: бүгіні мен болашағы» атты дөңгелек үстелге Армения СІМ, Армения Ұлттық жиналысының (Парламент), сарапшылар топтары, сараптамалық орталықтар, халықаралық ұйымдар, тиісті департаменттер мен жергілікті БАҚ өкілдері қатысты.
Қазақстанның Армениядағы Елшісі Болат Иманбаев шараға қатысушыларға арналған құттықтау сөзінде Қазақстанда жүргізіліп жатқан реформалар туралы баяндап, екіжақты қарым-қатынастардың қазіргі жағдайына баға беріп, оларды дамыту перспективаларына тоқталды.
«Армения-Қазақстан» парламенттік достық тобының жетекшісі Вагаршак Арутюнян Армения мен Қазақстан арасындағы екіжақты қарым-қатынастардың деңгейіне баға беріп, Қазақстанның ұлтаралық келісім саясатының қағидаттарын атап өтті.
«Армения мен Қазақстан арасындағы қарым-қатынас деңгейі әлдеқайда жоғары және әлдеқайда тиімді болды. Барлық деңгейдегі кездесулер бар: сауда өкілдерінен бастап, елдердің президенттеріне дейін. Менің ойымша, біз дұрыс бағытта келе жатырмыз. Біз қарым-қатынасымызды жоғары бағалаймыз. Қазақстан — көпұлтты мемлекет, бірақ армяндар сол жерде өздерін өте жақсы сезінеді. Сол үшін Қазақстанға рахмет», — деді Вагаршак Акопян.
Армения Республикасы СІМ Еуразиялық аймақ департаментінің басшысы Жирайр Ананян дөңгелек үстел тақырыбының символдық мәнін атап өтіп, елдер халықтары арасындағы достықты шынайы деп атады.
«Қазіргі уақытта біз Астана мен Ереван арасындағы мемлекетаралық қарым-қатынастар өзара қызығушылық тудыратын барлық сала бойынша серпінді дамып келе жатқанын көріп отырмыз. Біздің қарым-қатынастарымыздың бұл жоғары оң серпіні Қазақстан мен Армения халықтарын ғасырлар бойы жалғасып келе жатқан шынайы, нағыз достықтың берік байланыстарын танытып отыр. Бұл мұра одан әрі дамып келеді. Оған жоғары деңгейдегі сапарлар дәлел. Армения мен Қазақстан өзара сенім рухындағы стратегиялық ынтымақтастық бағыттылығы негізінде екі ел азаматтарының қазіргі және болашақ ұрпақтарының бірлескен өркендеуі мен берік достығы мүддесінде Достық пен ынтымақтастық туралы шарттың қағидаттары мен ережелерін іске асыруға бел байлағанын атап өткім келеді», — деп атап өтті Ж.Ананян.
Шара барысында екіжақты ынтымақтастықты одан әрі дамыту бойынша ұсыныстар әзірлеу мақсатында қызу пікір алмасу болды. Сарапшылар екіжақты қарым-қатынастарды дамытудың ортақ негіздерін атап өтті. Сондай-ақ, осы тұрғыда бірқатар бастамаларды ортаға салды. «Орта держава» мәртебесін растау ретінде Қазақстанның KazAID институты аясындағы бейбітшілік бастамалары мен гуманитарлық қызметі атап өтілді. Жергілікті мамандандырылған және халықаралық ұйымдардың өкілдері сауда қарым-қатынастарын, іскерлік байланыстарды дамыту аясындағы белсенді екіжақты байланыстар туралы баяндап, перспективалы екіжақты гуманитарлық бастамалар туралы пікірлерімен бөлісті.
Қазақстан Республикасы мен Армения Республикасы арасындағы Достық пен ынтымақтастық туралы шартқа 1999 жылғы 2 қыркүйекте Астанада Армения Президенті Роберт Кочарянның Қазақстан Республикасына ресми сапары барысында қол қойылды. Келісім 2001 жылдың 23 мамырында күшіне енді.
Биыл Қазақстан мен Армения Достық пен ынтымақтастық туралы шарттың 25 жылдығын атап өтті.
Еске салсақ, бұдан бұрын Армения Әзербайжанмен шекараны делимитациялау жөніндегі комиссиялардың бірлескен қызметі туралы ережені ратификациялағаны белгілі болды.
