Ерлан Каналимов елорда мәслихатының төрағасы болды
АСТАНА. ҚазАқпарат – Ерлан Каналимов Астана қалалық мәслихатының төрағасы болып сайланды, деп хабарлайды ҚазАқпарат тілшісі.
Ерлан Ермекұлы Каналимов 1982 жылы 22 тамызда дүниеге келген.
Білімі: Жеке білім беру мекемесі басқару институты (2003), мамандығы «Экономист». Қазақстан-Ресей университеті (2007), мамандығы «Құқықтану бакалавры».
Еңбек қызметі: 2003-2005 - Астана қаласы Сарыарқа ауданы әкімінің ұйымдастыру-бақылау және кадр жұмысы бөлімінің бас маманы; Астана қаласы Сарыарқа ауданы әкімінің кеңесшісі; 2005-2006 - Астана қаласы Сарыарқа ауданы әкімі аппаратының ұйымдастыру-бақылау және кадр жұмысы бөлімінің басшысы; 2006-2007 - Астана қаласы Сарыарқа ауданы әкімінің кеңесшісі; 2007-2009 - Астана қаласы әкімі аппаратының ұйымдастыру-инспекторлық жұмыс бөлімінің меңгерушісі; 2009-2013 - Астана қаласы әкімі аппараты басшысының орынбасары; 2013-2015 - Астана қаласы әкімдігінің «Зорлық-зомбылық қаупі салдарынан қиын жағдайға тап болған адамдарға арналған дағдарыс баспана-орталығы» КММ директоры;
2015-2018 - «Астана қаласының Ішкі саясат басқармасы» ММ басшысының м.а.; 2018-2019 - Астана қаласы Байқоңыр ауданының әкімі; 2019 жылы - Нұр-Сұлтан қаласы әкімінің орынбасары; 2019-2021 - «Nur Otan» партиясы Нұр-Сұлтан қалалық филиалы төрағасының бірінші орынбасары. 2021 жылдан бері Астана қаласы мәслихатының төрағасы қызметін атқарып келді.
Сонымен қатар, бүгін мәслихат сессиясында төрт тұрақты комиссияның төрағалары сайланды:
Заңдылық, құқық тәртібі және жұртшылықпен жұмыс мәселелері жөніндегі тұрақты комиссияға Азамат Айтқожин;
Бюджет, экономика, өнеркәсіп және кәсіпкерлік мәселелері жөніндегі тұрақты комиссияға Кендебай Адамбеков;
Құрылыс, экология, көлік, сауда және тұрғын үй-коммуналдық шаруашылық мәселелері жөніндегі тұрақты комиссиясға Владислав Сергеев;
сондай-ақ Әлеуметтік-мәдени даму мәселелері жөніндегі тұрақты комиссияға Асқар Смағұлов жетекшілік етеді.
Елорда мәслихатының құрамында 34 депутат қамтылған. 5 және одан да көп пайызын алған саяси партиялар үшін мандаттар былай бөлінді: «Amanat» партиясы – 12 мандат, «Қазақстан халық партиясы» – 1 мандат, «Байтақ» жасылдар партиясы – 1 мандат, «Ақ жол» Қазақстан демократиялық партиясы – 3 мандат. Тағы 17 депутат бір мандатты округтер бойынша Астана қаласы маслихатына өтті.
