Ерұлан Жамаубаев Jusan Holdings-ке қатысты пікір білдірді

АСТАНА. ҚазАқпарат – ҚР Үкіметіне Jusan Holdings компаниясының АҚШ сотындағы талап-арызы бойынша ешқандай құжат келіп түскен жоқ. Бұл туралы ҚР Премьер-Министрінің орынбасары – Қаржы министрі Ерұлан Жамаубаев айтты, деп хабарлайды ҚазАқпарат тілшісі.

«Әзірге, бізге осы мәселеге қатысты қандай да бір құжат келіп түспеді. Талап-арыз шетелдік юрисдикцияда болды. Бұл тұрғыда мәселенің мән-жайы анықталады деп санаймыз», - деді Е. Жамаубаев Сенатта тілшілер сұрағына жауап бере отырып.

Сонымен қатар ол талап-арызда көрсетілген іс-қимылдар ҚР Үкімет жағынан болмағанын нақтылады.

«Бұқаралық ақпарат құралдарындағы мәліметтерге қарасаңыздар, Қазақстан Үкіметі жағынан ешқандай іс-қимылдар жасалмады. Сондықтан сот бұл процеске қатысты мәселені анықтайды деп ойлаймын», - деді Қаржы министрі.

Осы орайда тілшілер Қазақстанның ұстанымын сотта қорғауы мүмкіндігіне қатысты сұрақ қойды.

«Егер қажет болса, қорғаймыз. Алдымен талап-арызды қабылдап, тиісті құжаттарды жолдауы керек. Әзірге, бізге құжаттар келіп түспеді», - деді ведомство басшысы.

Бұған дейін БАҚ-та Jusan құрылымдары Қазақстан Үкіметіне қарсы шағым түсіргені хабарланды.

Еске салсақ, жақында Бас прокуратура Jusan тобын Қазақстанға қайтару жұмысы жүргізіліп жатқанын хабарлады.

2022 жылғы маусымда Президент Қасым-Жомарт Тоқаевтың тапсырмасы бойынша елден заңсыз шығарылған қаражатты Қазақстанға қайтару жөніндегі ведомствоаралық комиссия құрылған сәттен бастап Бас прокуратура капиталды жымқыру және шет елге шығару фактілерін анықтау үшін банк секторында талдау жүргізді.

Сонымен қатар Назарбаев зияткерлік мектептері Jusan-ды елге қайтаруға қатысты мәлімдеме жасады.