«ЕуроХим» елге келіп, іске кірісті
АСТАНА. 29 қазан. ҚазАқпарат - «Көкжон» фосфор кен орнына асай-мүсейлерін ала келген «ЕуроХимҚаратау» компаниясы алғашқы бұрғылау-жару жұмысын бастады.
Оның салтанатты ашылу рәсіміне облыс әкімі Қанат Бозымбаев, Ресей Федерациясы «ЕуроХим» минералды-химиялық компаниясы ААҚ басқарма мүшесі - әкімшілік директоры Игорь Щелкунов, еліміздегі «Еурохим-Тыңайтқыш» ЖШС бас директоры Еркебұлан Мырзағалиев және Сарысу ауданының әкімі Қанатбек Мәдібек қатысты, деп жазады "Егемен Қазақстан" газеті.
Аталған жұмыс компаниялар арасындағы жер қойнауын игеру бойынша бекітілген шарт шеңберінде жүзеге асырылды. Қаратау фосфор кен орнын игеру, фосфорит концентратын өндіретін кен-байыту кешені мен кең ауқымда қолданылатын минералды тыңайтқыштар өндіретін зауыттың құрылыстарын салу - «ЕуроХимнің» кешенді жобасының бірі болып табылады. Жобаны жүзеге асыру барысында болашақ кәсіпорындар құрылысы мен қызмет көрсету салалары бойынша бірнеше мың жұмыс орны ашылады.
Мамандардың пікірінше, «ЕуроХимнің» облысқа келуі - Қаратау мен Жаңатас қалаларындағы көптеген әлеуметтік-экономикалық мәселелерді шешуге де септігін тигізеді. Сондай-ақ, компания аймақтың инфрақұрылымын дамытуға, әлеуметтік маңызы бар құрылыстарды қаржыландырып, кейбіреулерін қайта жаңғыртуда айтарлықтай үлес қосатын болады.
