Еурокомиссия басшысы ЕО-ның АҚШ тарифтеріне қатысты шараларын жариялады

АСТАНА. KAZINFORM — Дональд Трамп 2 сәуірді Американы «Азат ету күні» деп жариялап, барлық елге қарсы жаппай сауда тарифтерін енгізу күні етіп белгіледі, деп хабарлайды Euronews.

Еурокомиссия басшысы Урсула фон дер Ляйен мұндай саясат ешкімнің мүддесіне сай келмейтінін мәлімдеді.

Еуроодақтың қолында Дональд Трамптың Американың барлық сауда серіктесіне жаппай тарифтер енгізу жоспарын келіссөздер жүргізу, ұстау және қажет болған жағдайда «артқа итеру» үшін пайдалана алатын «көп карталары» бар, деп атап өтті Урсула фон дер Ляйен.

АҚШ-тың барлық сауда серіктесіне әсер ететін жаңа тариф пакеті қазірдің өзінде болат, алюминий және автомобильдерге 25 пайыздық баж салығы енгізілген ЕО-да алаңдаушылық тудырып отыр.

Еуропалық комиссия оларға қарсы шараларды ұсынды, бірақ оларды енгізуді сәуір айының ортасына дейін қалдырды. 

Брюссель жанжалды бейбіт жолмен шешуді талап етіп отыр, бірақ оның жауап ретіндегі қадамдарында «қызыл сызықтар» болмайтынын ескертті. 

Фон дер Ляйеннің айтуынша, тарифтер қарапайым тұтынушылар үшін бағаның көтерілуіне әкеледі, жұмыс орындарына қауіп төндіреді, кеденде «бюрократиялық құбыжық» жасайды және өз тауарларын Еуропаға экспорттайтын америкалық компаниялар үшін «сұмдыққа» айналады. 

Ол сондай-ақ тарифтер Трамптың Американы қайта индустрияландыру туралы көп айтылған күн тәртібіне қайшы келеді деп болжады.

— Бұл текетірес ешкімнің мүддесіне сай емес, — деді ол.

Өз сөзінде фон дер Ляйен комиссияның мақсаты Атлант мұхитының екі жағалауы арасындағы жаппай сауда соғысының алдын алу үшін «келіссөздер арқылы шешім» болатынын айтты.

— Біз бұл келіссөздерге күш позициясынан келеміз. Еуропа өз қолында көптеген карта ұстап отыр: саудадан технологияға және біздің нарықтың көлеміне дейін, — деп атап өтті ЕО атқарушы билігінің басшысы.

Ол қосып өткендей, егер келіссөз ымыраға әкелмесе, Брюссель барлық нұсқалары бар «қатаң қарсы шаралар» қабылдаудан тартынбайды.

ЕО тауарларға бажбен ғана емес, қызметтерге де шектеулермен жауап бере алады. 2023 жылы ЕО-да АҚШ-пен тауар саудасында (156,6 млрд еуро) профицитке және қызметтерде (108,6 млрд еуро) тапшылық болды.

Фон дер Ляйен шиеленісуді болдырмау үшін келіссөз жүргізуге шақырды, бірақ сонымен бірге ЕО көшбасшыларымен ортақ әрекетті үйлестіріп отыр. Алайда елдер өз экономикаларына зиян келтіруден қорқып, ортақ пікірге келе алмай отыр.

Бұған дейін ЕО Трамп тарифтері салдарынан 13,1 млрд еуро шығынға ұшырауы мүмкін екенін жазған болатынбыз.