Еуропалық комиссия президенті Иордания королімен телефон арқылы сөйлесті
АСТАНА. KAZINFORM — Еуропалық комиссияның президенті Урсула фон дер Ляйен аймақтағы шиеленістің күшеюіне байланысты Абдалла II Иордания королімен телефон арқылы сөйлесті, деп хабарлайды Kazinform агенттігінің Брюссельдегі меншікті тілшісі.
— Хаменеи кеткеннен кейін Иран халқына жаңа үміт пайда болды. Біз олардың болашағы өздеріне тиесілі болуын және оны өздері қалыптастыруын қамтамасыз етуіміз керек, — деді Урсула фон дер Ляйен.
Сондай-ақ, ол қазіргі кезеңнің өңірді зорлық-зомбылыққа итермелеуі мүмкін нақты тұрақсыздық қаупін де тудыратынын атап өтті.
— Біз тұрақтылық пен қауіпсіздікті қамтамасыз ету, сондай-ақ бейбіт тұрғындардың өмірін қорғау үшін барлық негізгі қатысушымен және аймақтық серіктестерімізбен тығыз жұмыс істейміз. Иордания Еуропа үшін өңірдегі маңызды серіктес және алдағы кезеңде шешуші рөл атқарады. Бұл қиын кезеңде көрсеткен көшбасшылығыңыз үшін алғыс айтамыз. Сіз біздің толық қолдауымызға сенім арта аласыз, — деп түйіндеді Урсула фон дер Ляйен.
Бұған дейін ЕО СІМ басшылары шұғыл видеоконференция өткізетіндігі хабарланған еді.
