Францияның мемлекеттік қарызы елге қауіп төндіруі мүмкін

Амели де Моншален Le Parisien басылымына берген сұхбатында Франция бесінші республиканың тарихындағы ең маңызды шешімдердің бірін қабылдау алдында тұрғанын айтты. Ол мемлекеттік қаржыны тұрақтандыру үшін билікті мүмкіндігінше тез арада шара қабылдауға шақырды.

Есеп палатасы басшысының бағалауынша, 2026 жылы мемлекеттік қарыз бойынша пайыз төлеуге шамамен 80 млрд еуро жұмсалады. Бұл Францияның Ұлттық білім министрлігінің 65 млрд еуро көлеміндегі бюджетінен көп және қорғаныс шығындарынан шамамен 40%-ға жоғары.

Де Моншаленнің айтуынша, қарыз бойынша пайыз төлеу шығындарының өсуі мемлекеттің мүмкіндіктерін шектеп, елдің егемендігіне қауіп төндіруі мүмкін.

Ол сондай-ақ Францияның мемлекеттік қарызы 2025 жылы рекордтық деңгейге жеткенін атап өтті. Францияның Ұлттық статистика және экономикалық зерттеулер институтының (Insee) мәліметінше, былтырғы жылдың соңында мемлекеттік қарыз көлемі 3,46 трлн еуроға немесе ішкі жалпы өнімнің 115,7%-ына жетті. Бір жыл бұрын бұл көрсеткіш 112,6% болған.

2026 жылдың бірінші тоқсанында мемлекеттік қарыз көлемі 3,536 трлн еуроға жетіп, оның ІЖӨ-ге шаққандағы үлесі 117,5%-ға дейін өсті.

Сонымен қатар де Моншален қарыз көлемінің одан әрі өсуі міндетті түрде жалғасады деген пікірмен келіспейді. Ол Германия, Италия және Португалияны мысалға келтіріп, бұл елдердің бұған дейін қарыз жүктемесін тұрақтандыра алғанын айтты.

— Егер шешімдер тез әрі жауапкершілікпен қабылданса, Франция үшін жағдайды өзгертуге мүмкіндік бар, — деді Есеп палатасының төрағасы.

Insee мәліметінше, 2025 жылы Франция бюджетінің тапшылығы ІЖӨ-нің 5,1%-ын, ал мемлекеттік қарыз 115,7% болды. 2026 жылдың бірінші тоқсанында қарыз жүктемесі тағы 1,8 пайыздық тармаққа өсіп, ІЖӨ-нің 117,5%-ына жетті.

Бір апта бұрын Қырғызстанның қазіргі мемлекеттік қарызы қанша екенін жарияладық.