Футбол: Бірінші айналымнан кейін көш басында «Тобыл» тұр
АСТАНА. Мамырдың 21-і. ҚазАқпарат /Ернұр Ақанбай/ - Кеше футболдан Премьер-лига командалары арасында Қазақстан чемпионатының 11-ші туры өтті.
Бұл ел біріншілігіндегі бірінші айналымның соңғы ойыны болды. Осы турдағы орталық матч Павлодардың «Ертіс» және Қостанайдың «Тобыл» командалары арасындағы өтті. Қос мықты 90 минут бойы бірін-бірі ала алмады, есеп - 0:0. Алайда, осы турда ұпай санын арттыру үшін өздеріне берілген мүмкіндікті бас жүлдеден үміткер - Ақтөбенің «Ақтөбе» және Қарағандының «Шахтер» командалары пайдалана алмады. «Ақтөбе» сырт алаңда «Таразбен» 2:2 есебімен тең ойнады, ал «Шахтер» болса қонақта «Атыраудан» 1:0 есебімен ұтылып қалды.
Осылайша, бірінші айналымның нәтижесі бойынша көш басында «Тобыл» тұр, қостанайлықтардың еншісінде 24 ұпай бар. Екінші орында 22 ұпаймен «Ертіс», үшінші орында 20 ұпаймен «Шахтер» келеді.
11-ші турдағы қалған матчтардың нәтижелері мынадай: «Жетісу»-«Локомотив» 1:0, «Қайрат»-«Ордабасы» 1:0, «Оқжетпес»-«Ақжайық» 0:1. Екінші айналымның ойындары 12-ші турмен мамырдың 25-де басталады.
