Футбол: «Ордабасы» «Астанаға» жақындап келеді
Осыған дейін жеңілістің ащы дәмін татпаған Алматының «Қайраты» Атырауда аяқ астынан ұтылып қалды. Сергей Павлов команда тізгінін қолға алғаннан кейін жағдайы түзеле бастаған атыраулықтар бұл ойында 2:1 есебімен жеңіске жетті. 26-минутта бұрыштамадан берілген допты Ян Вороговский абайсызда өз қақпасына соғып алды. Ал екінші таймда Шавкат Саломовтың пасын шебер пайдаланған Владимир Двалишвили есепті 2:0-ге жеткізді. Бұдан кейін алматылықтар қаншама тырысқанымен, қосымша минуттарда Бауыржан Тұрысбектің мергендігі арқасында есепті тек қысқарта алды. Осылайша ойда жоқ жерден ұтылып қалған «Қайрат» турнир кестесінде төртінші орынға сырғып кетті.
Өткен турда «Қайратпен» тең ойнаған «Астана» Қостанайда «Тобылмен» кездесті. Осының алдында Оралда «Ақжайықтан» ұтылып қалған қостанайлықтар барын салды. 71-минутта Жасұлан Молдақараевтың пасынан кейін команданың сұрмергені Алексей Щеткин есеп ашты. Дегенмен «Астана» құрамындағы конголық Жуниор Кабананга да қарап қалған жоқ. Алаң иелерінің қорғаныстағы қателігін пайдаланған ол таразы басын теңестіріп кетті.
Астаналықтардың екі ұпай жоғалтқаны шымкенттіктерге қолайлы болды. Өз алаңында «Ақжайықты» 3:0 есебімен (гол авторлары - Пабло Фонтанельо, Темірлан Ерланов, Таңат Нөсербаев) ойсырата жеңген «Ордабасы» 22 ұпай жинап, көш басындағы «Астанаға» (24 ұпай) жақындай түсті. Дегенмен астаналықтардың бір ойыны кем екендігін айта кетейік. Үшінші орынға Қарағандыда «Шахтерді» 1:0 есебімен (гол соққан Пиралы Алиев) тізе бүктірген Павлодардың «Ертісі» (20 ұпай) көтерілді.
Біріншілікті үш бірдей жеңіспен тамаша бастағанымен, кейін «аяғына жем түскен» Қызылорданың «Қайсары» бұл жолы өз алаңында «Ақтөбені» қабылдап, 3:2 есебімен жеңісті жұлып алды. Алдымен Владимир Аржанов қос доптың авторы атанса, одан кейін ақтөбеліктер (Витор Жуниор, Игорь Зенькович) есепті теңестірді. Қосымша минутта «Ақтөбенің» қақпасына 11 метрлік айып добы белгіленіп, оны «Қайсардың» капитаны Мақсат Байжанов сәтті орындай білді. Сөйтіп «Қайсар» қайтадан алтыншы орынға шықты. Ал Таразда жергілікті команданы 1:0 есебімен (Тимур Досмағамбетов) ұтқан Көкшетаудың «Оқжетпесі» сегізінші орында келеді.
Айта кетейік, 14 мамыр күні бірінші кезеңнің екінші айналымы басталады. Онда «Тараз» - «Қайсар», «Оқжетпес» - «Қайрат», «Ақтөбе» - «Тобыл», «Атырау» - «Ордабасы», «Шахтер» - «Ақжайық», «Астана» - «Ертіс» командалары өзара күш сынасады.