Футболдан Қырғызстан чемпионатының шешуші ойынына қазақстандық төрешілер бригадасы төрелік етеді
БІШКЕК. Қарашаның 5-і. ҚазАқпарат /Евгений Новиков/ - Дүйсенбі, қарашаның 9-ында қырғыздың Қант қаласында футболдан Қырғызстан чемпионатының шешуші ойыны өтеді. «Абдыш-Ата» және «Дордой-Динамо» командаларының арасында өтетін бұл ойынға қазақстандық төрешілер бригадасы төрелік етеді.
Бұл командалар қырғыз футболының көшбасшылары болып табылады. «Абдыш-Ата» командасы жеңіске жеткен жағдайда, ел чемпионатын анықтау үшін «алтын доп» тағайындалады. Ал басқаша аяқталған жағдайда, «Дордой» кезекті чемпиондық атаққа ие болады.
Қырғыз Футбол федерациясының бөлім бастығының айтуынша, алдағы жекпе-жектің маңыздылығы ескеріле отырып, сондай-ақ барынша объективті төрелікті қамтамасыз ету мақсатында Қазақстаннан реферилер шақыру туралы шешім қабылданған. Төрешілердің аты-жөндері жария етілмей отыр. Ал Матч инспекторы халықаралық санаттағы бұрынғы арбитр Николай Левников (Ресей) болады.
