Ғалымдар Африка мен Оңтүстік Америкада динозаврлардың ұқсас іздерін анықтады

АСТАНА. KAZINFORM – Динозаврлар 120 млн жылдай уақыт бұрын Бразилия мен Камерун арасында көшіп жүрген, деп хабарлайды Trend. 

Оңтүстік Методист Университетінде (ОМУ) жүргізілген зерттеуде атап өтілгендей, Африка және Оңтүстік Америка құрлықтарынан анықталған динозаврдың 260-тан астам ізі олардың арасы шамамен 6000 шақырымға бөлінгеніне қарамастан сәйкес келеді.

Зерттеу динозаврлар Бразилия мен Камерун арасында шамамен 120 млн жыл бұрын, дәлірек айтқанда, ерте бор кезеңінде көшіп жүргенін көрсетті.

Пангея ыдырағаннан кейін пайда болған Атлант мұхитының екі шетінде, шамамен 6000 км қашықтықта орналасқан құрлықтарда бір-біріне сәйкес келетін 260-тан астам динозавр ізі табылды.

Ұқсас іздерден басқа, зерттеушілер Бразилияның Борборема аймағында және Камерунның солтүстігіндегі бассейндерде, өзендер мен көл құрылымдарында ұқсастықтардың дәлелдерін тапты.

Зерттеу жүргізген ғалымдардың бірі Диана Виньярд табылған қазбалардың көпшілігі үш саусақты теропод динозаврларына, ал кейбіреулері төрт аяқты зауроподтар мен орнитоперлерге тиесілі екенін айтты.

Зерттеу саласындағы жетекші сарапшы Луи Джейкобс іздердің жасы, пішіні және геологиялық жағдайы бойынша өте ұқсас екенін атап өтті.

Джейкобс динозавр таснұсқалары мен олардың іздері миллиондаған жылдар бұрын ғаламшарда жүрген түрлер туралы бірегей ақпарат береді деп сендіреді.

Оның айтуынша, қалдықтар динозаврлардың тіршілік ету ортасы мен қоректену әдеттері сияқты мәліметтерден сыр шертіп отыр.