Газа секторына жасалған әуе соққысы кезінде ХАМАС саяси бюросының мүшесі қаза тапты

АСТАНА. KAZINFORM – ХАМАС саяси бюросының мүшесі Салах әл-Бардавил Израильдің Газа секторындағы Хан-Юнис қаласына жасаған әуе соққысынан қаза тапты, деп хабарлайды ВВС.

Бұл туралы жексенбі күні таңертең топ өкілі хабарлады.

Бардавиль танымал тұлға болған және жергілікті БАҚ-та жиі көрінетін.

Жергілікті тұрғындардың айтуынша, Бардавильмен бірге оның жары да қаза тапқан. Reuters агенттігінің хабарлауынша, Израиль зымыраны олардың дұға оқып отырған шатырын көздеп атқан.

Израиль билігі бұл мәлімдемеге әлі пікір білдірген жоқ.

Израиль әскері сейсенбі күні Газа секторына ауыр соққылар жасауды қайта жалғастырды. Тель-Авив ХАМАС-ты Катар, Мысыр және АҚШ-тың арағайындығымен 19 қаңтарда жасалған атысты тоқтату келісімін бұзды деп айыптауда. Алайда ХАМАС бұл айыптарды жоққа шығарды.

ХАМАС бақылауындағы Газа Денсаулық сақтау министрлігінің мәліметінше, соңғы тәулікте сектордың әртүрлі бөліктерінде 32 палестиналық қаза тапқан.

Бұған дейін хабарланғандай, Израиль Газада әскери операциясын қайта бастаған үш күннің ішінде жергілікті биліктің мәліметі бойынша 600-ге жуық адам қаза тапқан.