Газа секторында тағы бір сәби аштықтан көз жұмды

АСТАНА. KAZINFORM – Газа секторында Израильдің шабуылдары мен толық қоршауы салдарынан тағы бір нәресте аштықтан қаза тапты, деп хабарлайды Anadolu.

Рантиси балалар ауруханасының мәліметінше, Рания Габан есімді сәби қажетті медициналық көмек пен азық-түлік жетіспеушілігінен шетінеп кетті. Дәрігерлердің айтуынша, бұл жағдай – Израиль жүргізіп отырған шабуыл мен аштық саясатының салдары.

Газа денсаулық сақтау министрлігінің деректеріне сәйкес, 2023 жылғы 7 қазаннан бері аштық пен дұрыс тамақтанбаудан көз жұмғандар саны 332-ге жетті. Оның ішінде 124-і – балалар.

Агенттіктің хабарлауынша, мыңдаған жүк көлігі гуманитарлық жүктерімен Мысыр жағындағы «Рафах» өткізу бекетінде тұрып қалған. Израиль шектеулі көлемде ғана көмекті өткізуге рұқсат беруде.

Израиль тарапы «гуманитарлық себептермен» жүк кіргізіліп жатқанын айтса да, Газа билігі оның халықтың нақты қажеттілігінің тек 14 пайызын ғана қамтып отырғанын мәлімдеді.

Соңғы айда кіргізілген азық-түлік пен коммерциялық тауарлардың басым бөлігі бірінші кезектегі қажеттілікке жатпайды және жергілікті базарларда тым жоғары бағамен сатылып жатыр.

Айта кетейік, БҰҰ Газадағы аштықты тоқтату үшін күн сайын жүздеген жүк көлігін жеткізу керектігін хабарлаған болатын.