Германия пана сұраушылар үшін шекарасын жабады

АСТАНА. KAZINFORM — Бейсенбіден бастап Германия пана сұраушыларды елге кіргізбейді және шекарадағы бақылауды күшейтеді, деп жазады Euronews.

Бұл туралы елдің ішкі істер министрінің жаңа басшысы Александр Добриндт мәлімдеді.

Канцлер лауазымына кіріскен алғашқы күнінде Фридрих Мерц «заңсыз кіру әрекеттерінің барлығына тосқауыл қойылатынын, жарамды төлқұжаты жоқ барлық адам үшін кіруге тыйым салынады» деп мәлімдеді. Бұл Еуропалық Одақтың қауіпсіз елдері арқылы өтетін пана сұраушыларға да қатысты.

Ақпан айында Ашаффенбурде елден шығарылуы тиіс 28 жастағы Ауғанстан азаматы саябақта балабақша бүлдіршіндеріне пышақпен шабуыл жасаған. Қайғылы оқиға салдарынан марокколық бала мен неміс азаматы қаза тапты, тағы үш адам ауыр жарақат алды.

Енді жаңа ішкі істер министрі Александр Добриндт (ХСС) Мерцке берген уәдесін орындауға кірісті.

Сәрсенбіде Добриндт федералды полицияға шекаралық бақылауды күшейту және заңсыз кіру жағдайында құжаттарды қабылдаудан бас тарту туралы бұйрық берді. Бұл ЕО елдері мен Швейцария арқылы алғаш рет елге кіретін адамдарға қатысты.

Айта кету керек, 2015 жылы Меркель кезінде шығарылған қаулыда федералды полиция қызметкерлеріне құжаттары заңсыз мигранттарды, егер олар пана сұраса, неміс шекарасынан өтуге рұқсат беруді міндеттеген («Құжаттары жоқ және пана сұрайтын үшінші елдердің азаматтарына кіруге рұқсат етіледі»). Бұл құжаттың салдарынан тоғыз жыл бойы жүздеген мың адам Германияға бақылаусыз кірді, бірақ олардың көпшілігінің пана алуға құқығы болмады. Бақылаусыз және заңсыз миграция Германияда қылмыс пен зорлық-зомбылықтың артуы тәрізді қауіпсіздік мәселелерін туындатты.

Бұған дейін Қасым-Жомарт Тоқаев Фридрих Мерцті Германияның Федералдық Канцлері болып сайлануымен құттықтағаны хабарланды.

Еуроодақ көшбасшылары Мерцті жаңа лауазымымен құттықтағанын жазғанбыз.