Google Earth Жердің үстімен ұшуға арналған тегін авиасимуляторды іске қосты
АСТАНА. KAZINFORM — Google Earth қолданушылары браузердің ішінде тікелей виртуалды ұшақты басқару мүмкіндігіне ие болды. Жаңа авиасимулятор Жерді құс ұшатын биіктіктен зерттеуге мүмкіндік береді. Енді пайдаланушылар әлемнің әртүрлі бөліктеріндегі 3D қалалар мен табиғи ландшафтарды бақылай алады, деп хабарлайды Euronews.
12 маусымда іске қосылған құрал негізінен авиация мен саяхат әуесқойларына арналған. Ұшу үшін қосымша бағдарламаларды орнату қажет емес — тек браузерде Google Earth ашып, Flight Simulator режимін қосу жеткілікті.
Виртуалды саяхат кезінде пайдаланушылар планетаның түрлі аймағынан ұшып, жоғары деңгейде егжей-тегжейлі жасалған 3D ғимараттарды, көрікті жерлерді және жер бедерінің панорамаларын тамашалайды.
Бұған дейін авиасимулятор тек Google Earth-тің кәсіби жұмыс үстелі нұсқасында ғана болған. Енді бұл функция алғаш рет веб-нұсқаға біріктіріліп, оны кең аудиторияға қолжетімді етті.
Симуляторды іске қосу үшін Google Earth ашып, Explore Earth бөлімін таңдап, кейін Tools мәзіріне кіріп, Flight Simulator батырмасын басу қажет.
Әзірлеушілер ұшақты басқаруға арналған жылдам пернелер тізімін де жариялады. Пайдаланушыларға жылдамдықты арттыру, тежеу, бағытын өзгерту, биіктікке көтерілу және маневр жасау командалары қолжетімді.
Ойын-сауық сипатында болғанымен, басқаруды меңгеру оңай емес. Егер виртуалды ұшақ жерге соғылса, симулятор ұшуды автоматты түрде тоқтатып, маршрутты қайта бастауға мүмкіндік береді.
Айта кетейік, Қазақстанда авиациялық жұмыстар тек сертификатпен жүргізілуі тиіс.
