Грекиялық фермерлер тракторларымен наразылық акциясын өткізді
АСТАНА. KAZINFORM — Фермерлер мемлекеттік субсидиялардағы сыбайлас жемқорлыққа байланысты тергеу кезінде төлемдердің кешігуін жеделдетуді және өндіріс шығындарын азайтуға арналған заңнамалық шараларды қабылдауды талап етті, деп хабарлайды Анадолы.
Соңғы бірнеше апта бойы олар елдің әртүрлі аймақтарында жолдарды жауып, үкіметтің назарын аударуға тырысты.
Акцияға қатысушылар Афины қаласындағы Синтагма алаңында жиналып, тракторларын парламент ғимараты алдында тізіп қойды.
Фермерлерге мемлекеттік және жеке сектор өкілдері, студенттік ұйымдар және түрлі қоғамдық бірлестіктер қолдау көрсетті.
Сонымен қатар, акцияға Грекия Коммунистік партиясының бас хатшысы Димитрис Куцумбас та қатысты.
«Анадолы» агенттігіне берген сұхбатында Трикала қаласының фермері Антонис Сарас өндіріс шығындарының өсуі мен өнімнің сатып алу бағасының төмендігі салдарынан фермерлердің ауыр жағдайда екенін айтты.
— Біз айлар бойы егістікте жұмыс істейміз, бірақ еңбегімізге лайықты ақы алмаймыз. Біз мұнда өзімізді естірту үшін келдік. Балаларымыздың болашағы үшін, — деді ол.
Осыған дейін былтыр грекиялық теміржолшылар саладағы өзекті мәселелерді шешуді талап етіп, ел бойынша 24 сағаттық ереуілге шыққанын жазған болатынбыз.
