Грэпплингтен Азияның алғашқы чемпионаты Астанада өтеді

АСТАНА. ҚазАқпарат - Грэпплинг сүйер қауым үшін айтулы шара 2-3 қыркүйек күндері елорданың «Дәулет» спорт кешенінде өтеді. Бұл туралы Грэпплинг федерациясының президенті Қанат Алинге сілтеме жасап Астана әкімдігінің баспасөз қызметі хабарлады. 

Қазақстан турнирді өткізу құқығына ие болу үшін іріктеуге қатысып, БАӘ мен Үндістан сынды елдерді басып озды.

«Халықаралық турнирді өткізу - біздің федерация үшін өте жауапты шараның бірі. Бүгінгі таңда грэпплинг көптеген елдерде кең танылған жекпе-жек түрі. Грэпплинг - түрлі палуандар тәртібінің техникаларын біріктіретін синтетикалық күрестің түрі», - деді Қ.Алин.

Бүгінгі таңда жарыстың ұйымдастырушылары 30 елдің спорт федерацияларымен келіссөздер жүргізуде. Қырғызстан, Тәжікстан, Өзбекстан, Жапония, Үндістан, Пәкістан және тағы басқа елдер өздерінің қатысатынын растады.

«Осы күні бізде Азия ауқымындағы ең мықты команда бар. Алдағы чемпионатта құрама командалары жалпыкомандалық есепте бірінші орынды алуға атсалысатын болады», - деді Қ.Алин.