«ХАС» қаржы пирамидасының негізін қалаушылар алаяқтық үшін сотталды

ПАВЛОДАР. KAZINFORM — Павлодарда «ХАС» деп аталатын қаржы пирамидасын құру ісі бойынша резонансты сот үкімі шығарылды. Бұл туралы Павлодар облысының прокуратурасы хабарлады.

— Сот 2022-2023 жылдар аралығында қаржы пирамидасының басты ұйымдастырушысының қылмыстық топты құрып, оны басқарғаны анықтады. Ол азаматтардың ақшалай қаражатын жоғары табысты инвестиция ретінде тарту арқылы алаяқтықпен айналысқан. Уәде етілген 70%-ға дейінгі пайда көпшілікке тартымды көрініп, көптеген азаматтар сеніп қалған, — делінген хабарлдамада.

Салдарынан Астана, Алматы, Павлодар, Екібастұз және басқа да елді мекендерде 376 азамат алаяқтарға 2 миллиард теңгеден астам қаражат тапсырған.

Мемлекеттік айыптаушы тарап — прокуратура қылмыстық схеманы ұйымдастырушыға қатаң жаза тағайындауды талап етті. Сот айыптау тарапының ұстанымын қолдап, қаржы пирамидасының негізін қалаушыны 12 жылға бас бостандығынан айырды. Қылмыстық топтың қалған мүшелері де түрлі мерзімдер мен жаза түрлеріне кесілді.

Айта кету керек, прокуратура істің әділ үкіммен аяқталуында маңызды рөл атқарды. Ол сотқа ұйымдасқан алаяқтықтың жан-жақты дәлелдерін ұсынды.

Қазіргі таңда үкім заңды күшіне енген жоқ.

Айта кетелік «Asar Baspana» қаржы пирамидасы 86 мыңнан астам азаматтан 12,4 млрд теңге тартқан еді.