III Түркі универсиадасына Қазақстан атынан 66 студент-спортшы қатысады

АСТАНА. KAZINFORM — 2025 жылғы 3-9 қыркүйек аралығында Қырғыз Республикасының Чолпон-Ата қаласында жоғары оқу орындарының студенттері арасында III Түркі универсиадасы өтеді. Бұл туралы Ғылым және жоғары білім министрлігі мәлім етті.

— Универсиадаға Түркі мемлекеттері ұйымына мүше елдердің (Қазақстан Республикасы, Әзербайжан Республикасы, Қырғыз Республикасы, Түркия Республикасы, Өзбекстан Республикасы) студент-спортшылары қатысады. Жарыс волейбол, футзал, үстел теннисі, шахмат, дзюдо, еркін күрес және грек-рим күресі сияқты 7 спорт түрі бойынша өтеді, — делінген хабарламада.

Универсиаданың салтанатты ашылу рәсімі 4 қыркүйекте сағат 18:00–де, жабылу рәсімі 8 қыркүйекте сағат 18:00–де өтеді.

Қазақстан атынан 15 жоғары оқу орнынан 66 спортшы 7 спорт түрі бойынша ел намысын қорғайды.

Айта кету керек, II Түркі универсиадасы да осы 7 спорт түрі бойынша 2023 жылғы 5-10 қараша аралығында Түркістан қаласында өткізілген. II Түркі универсиадасына Түркі мемлекеттері ұйымына мүше 5 елден 445 делегат қатысты.

ҚР Ғылым және жоғары білім министрлігі студенттердің республикалық және халықаралық деңгейдегі спорттық іс-шараларға белсенді қатысуына ықпал етуді жалғастырып келеді.

Айта кетейік, бұған дейін Астанада британдық университеттің филиалы ашылғанын жазған едік.