ИКАО Қазақстанның Ақтау маңындағы ұшақ апатын тергеу бойынша есебін жоғары бағалады
АСТАНА. KAZINFORM – Вице-премьер Қанат Бозымбаев ИКАО Еуропалық және солтүстікатлантикалық бюросының директоры Николя Ралломен кездесті.
Қанат Бозымбаев ИКАО-ға Қазақстанмен ынтымақтастық мәселесінде тұрақты қолдау білдіріп келе жатқанына ризашылық танытып, Azerbaijan Airlines әуе кемесі апатқа ұшыраған жерге тәуелсіз сарапшы Тормодура Тормодссонды дер уақытында жібергені үшін алғыс айтты.
- Үкімет атынан бізге көрсеткен тұрақты қолдауыңыз, оның ішінде бастамаларымызға қолдауыңыз үшін сізге шынайы ризашылығымды білдіремін. Аталған тергеуді толықтай аяқтау үшін ИКАО-мен өзара іс-қимылды жалғастырамыз, - деді Үкімет басшысының орынбасары.
Вице-премьер әуе кемесі апатқа ұшыраған бірінші күннен бастап Қазақстан аталған оқиғаны шынайы және егжей-тегжейлі тергеуді мақсат тұтқанын баса айтты.
Николя Ралло өз кезегінде Қазақстанның қысқа ғана уақыттың ішінде «Azerbaijan Airlines» әуе компаниясы ұшағының апатын тергеу бойынша жүргізген және жариялаған алдын ала есебін жоғары бағалады.
- Қазақстан мен тергеу жөніндегі барлық комиссияны олардың күш-жігері үшін атап өткім келеді. Өйткені, олар апаттан кейін 1,5 айға толмайтын уақыттың ішінде аталған алдын ала есепті аяқтауға мүмкіндік берді. Мен сізді тергеудың барлық процесі барысында Халықаралық азаматтық авиация туралы конвенцияны толықтай сақтауды қамтамасыз етуді жалғастыруға шақырамын, - деді Николя Ралло.
Айта кетейік, 25 желтоқсанда Ақтау маңында Бакуден Грозныйға бағыт алған AZAL жолаушылар ұшағы апатқа ұшырады.
Бортта 67 адам, оның ішінде бес экипаж мүшесі болған. Апат салдарынан 38 жолаушы қаза тауып, 29 адам аман қалды.
Таяуда Ақтау маңындағы ұшақ апаты бойынша тергеудің есебі жарияланды.
Күні кеше Ақтаудағы ұшақ апатынан кейін Көлік оқиғаларын тергеу жөніндегі арнайы орталық құрылатыны белгілі болды.
Сонымен қоса ұшақ апатының себебі жыл соңына дейін анықталатыны айтылды.
