Индиан-Уэллс турнирі: 17 жастағы теннисші екінші рет Рыбакинаның жолын кесті

АСТАНА. KAZINFORM – Қазақстанның бірінші, әлемнің 7-ракеткасы Елена Рыбакина Индиан-Уэллс WTA 1000 турнирінің ширек финалынан тыс қалды.

Қазақстандық теннисші төртінші айналымда әлемнің 11-ракеткасы, 17 жастағы ресейлік Мирра Андреевамен жолықты.

Өткен айда Дубайдағы дәл осындай жарыстың жартылай финалында М.Андреева Е.Рыбакинаның жолын кескен еді.

Бұл жолы бірінші партияда есеп 1:1 болған мезетте ресейлік спортшы брейк жасап, күш алып кетті – 6:1.

Екінші сетті Е.Рыбакина брейкпен бастағанымен, жиі қателесіп, сол қарқынын жалғастыра алмады – 1:4. Ақыры 2:6 есебімен жеңіліс тапты.

Бір сағаттан астам уақытқа созылған бәсеке барысында Рыбакина мүлдем эйс жасамады, яғни басты қаруының бірінен айырылды деуге болады. Сондай-ақ 1 брейкпен шектелді. Андреева 2 эйспен бірге 12 брейк-пойнттың тең жартысын мүлт жібермеді. 

М.Андреева жартылай финалға шығу үшін рейтингіде 23-сатыдағы украиналық Элина Свитолинамен таласады. Ол ширек финалда әлемнің 4-ракеткасы, америкалық Джессика Пегуланың мысын басты – 5:7, 6:1, 6:2. 

Еске сала кетейік, бұдан бұрын Михаил Кукушкиннің АҚШ-тағы турнирде екінші жеңісіне қол жеткізгенін жазған болатынбыз.