Instagram-да тек қазақ тіліндегі бұйрықты екі етпейтін Майлыбек атты иттің қылықтары жұртты тәнті етті
АСТАНА. KAZINFORM – Instagram әлеуметтік желісінде Майлыбек атты иттің иесі түсірген видеолар күннен-күнге танымал болып келеді. Ең қызығы Майлоның иесі оған тек қазақ тілінде сөйлеп, бұйырса, өтініш айтса құйрығын бұлғаңдатып, айтқанын екі етпей орындайды.
Темірлан Тоспаев есімді блогердің төрт аяқты досы Майлыбек Instagram әлеуметтік желісінде көптің жүрегін жаулап үлгерді. Тек қазақ тілінде ән тыңдап, билегенді жақсы көреді. Тіпті мультфильмді де тек мемлекеттік тілде көргенді ұнататыны көпшіліктің қызығушылығын тудырды.
Сүйкімді төбеттің қылықтарына сүйсінген желі қолданушылары түрлі пікір қалдырып, таңданыстарын білдірді.
Майлоның қазақ тіліне деген сүйіспеншілігі мен махаббатын бағалаған оқырмандар «Мынаны Тина көрмесін, әйтпесе Қазақстанда иттер орыс тілін қорлап жүр деп», «Жүрегі қазақ деп соққан Майло жасай бер, әр отбасына сендей бір Майлыбек керек екен», «Қазақша сөйлей алмай жатқан қазақ депутаттарға үлгі болсын Майломыз» деген сынды түрлі комментарий қалдырған.
