Интернетті шулатқан Астанадағы үйлену тойы кортежінің жүргізушілеріне айыппұл салынды - ВИДЕО
АСТАНА. ҚазАқпарат - Бүгін Интернетте жас жұбайлар мінген кортежді видеоға түсіру үшін жол ережелерін бұзып, жолдың қарсы бағытына шыққан, сондай-ақ, тағы да заңға қайшы әрекет - артымен жүрген көліктердің видеосы жарияланған болатын. Оқиға Астана қаласының орталық көшесі - сол жағалаудағы Д.Қонаев көшесінде орын алған. Елорданың Ішкі істер департаменті жол жүру ережесін бұзған жүргізушілерді тауып, оларға айыппұл салынғанын хабарлайды.
Астана қалалық Ішкі істер департаментіне қарасты Жедел басқару орталығының бейнекамералары арқасында той кортежінің жүргізушілері, жол ережесін бұзған көліктердің саны анықталған екен. Астана қалалық ІІД Әкімшілік полиция басқармасы жол-патурльдік полициясының инспекторлары жол ережесін өрескел бұзған жүргізушілерді тауып, әкімшілік жауапкершілікке тартты.
Анықталғандай, кортеж жүргізушілері Әкімшілік құқық бұзушылық кодексінің 596-бабы, 3-тармағын (жолдың қарсы бетіне шығу), Кодекстің 596-бабы, 2-тармағын (жол қатарларынан шығу), Кодекстің 595-бабы, 2-тармағын (көлікті артымен жүргізу), Кодекстің 590-бабы, 2-тармағын (көліктің мемлекеттік тіркеу белгісін алып тастау) бұзып, ойларына келгенін жасаған. Осы баптармен қатар, кортеж жүргізушілеріне сигнал бергендері үшін Кодекстің 593-бабы, 1-тармағына сай айыппұл салынған.
«Жол ережесін бұзған азаматтардың туған-туыстарын әкімшілік жауапкершілікке тарту үшін ешқандай негіз жоқ», - деп атап өткен ІІД баспасөз қызметі.
