Иран ядролық қаруды таратпау туралы шарттан шығуға дайындалып жатыр
АСТАНА. KAZINFORM — Тегеранда Иранның ядролық саладағы халықаралық міндеттемелерін қайта қарау мәселесі талқыланып жатыр, деп хабарлайды Kazinform агенттігінің меншікті тілшісі.
Жексенбіде Иран парламентінің бір топ депутаты елдің Ядролық қаруды таратпау туралы шарттан шығуын көздейтін заң жобасын парламент төралқасына енгізді.
Заң жобасы шұғыл қаралатын құжат ретінде белгіленді. Алайда оны ашық талқылауға шығару үшін парламент спикері Мохаммад Багер Галибафтың келісімі қажет, деп хабарлайды Tasnim агенттігі.
Депутат Хоссейн Әли Хаджиделигани жексенбі күнгі парламент отырысында заң жобасы әзірленгенін айтты. Оның сөзінше, әскери қақтығыс пен халықаралық қысым күшейген тұста Иранның келісімге қатысуын одан әрі жалғастыруы ел мүддесіне сәйкес келмейді.
— Қазіргі жағдайды және қарсы тараптың елімізге екі рет жасаған шабуылын ескерсек, Ядролық қаруды таратпау туралы шартқа мүше болып қала беру бізге пайда әкелмей, керісінше, шығынға ұшыратып отыр, — деді депутат.
Хоссейн Әли Хаджиделигани бұл бастаманы Атом энергиясы жөніндегі халықаралық агенттік (АЭХА) Басқарушылар кеңесінің Иранға қатысты шешімімен байланыстырды. Тегеран инспекция талаптарын сақтамады деген негізбен Иран мәселесін БҰҰ Қауіпсіздік Кеңесіне жіберу туралы шешім қабылданған.
The chairman of the Iranian Parliament's National Security and Foreign Policy Commission says that the option of Iran’s withdrawal from the Non-Proliferation Treaty (NPT) is on the table.https://t.co/w2gDKBuimw
— Mehr News Agency (@MehrnewsCom) September 20, 2026
Бұған дейін Иран Жоғары ұлттық қауіпсіздік кеңесінің хатшысы Мохсен Резаи ел басшылығының Ядролық қаруды таратпау туралы шарттан шығу мүмкіндігін қарастырып жатқанын растаған еді. Сонымен қатар ол Иранның ядролық доктринасы өзгермегенін айтып, елдің келісімге одан әрі қатысуы АҚШ-тың келесі әрекеттеріне байланысты болатынын мәлімдеді.
Айта кетейік, ядролық қаруды таратпау туралы шарт 1970 жылдан бері күшінде. Оның негізгі мақсаты — ядролық қарудың таралуына жол бермеу. Иран бұл келісімге ядролық қаруы жоқ мемлекет ретінде қатысады. Осыған байланысты елдің ядролық нысандары Атом энергиясы жөніндегі халықаралық агенттіктің кепілдіктері мен бақылауында. Тегеран ядролық бағдарламасының тек бейбіт мақсатты көздейтінін бірнеше рет мәлімдеген.
2025 жылдың маусымында Иранның ядролық нысандарына жасалған соққыларға дейін АЭХА елдегі 60 пайызға дейін байытылған уран қорын шамамен 440 келі деп бағалаған. Алайда шабуылдардан кейін бұл қордың қайда орналасқаны және қазіргі жағдайы қандай екені белгісіз.
Бұған дейін Иран АҚШ-пен соғысты тоқтатудың шарттарын атағанын хабарлаған болатынбыз.
Ақзат Жиеналина
