Ішкі әскерлер Батыс құрамасының ақпарат-насихат тобы Батыс Қазақстан облысында болды
ОРАЛ. 5 желтоқсан. ҚазАқпарат - ҚР ішкі әскерлері Батыс құрамасының ақпарат-насихат тобы мен әскери оркестрі «Ішкі әскерлер нағыз ер адамдар үшін» шарасы аясында Орал мен Ақсай қалаларында, Бөрлі және Зеленов аудандарының елді мекендерінде болды.
Батыс құраманың баспасөз қызметінің бастығы, майор Ерболат Сұлтановтың хабарлағанындай, шара мақсаты - Елбасы Жолдауының негізгі бағыттарын түсіндіру, ішкі әскерлердің беделін көтеру, азаматтардың оларға деген оң көзқарасын қалыптастыру. Аталмыш топ жетекшісі - Батыс құрама командирінің тәрбие және әлеуметтік-құқықтық жұмыстар жөніндегі орынбасары, подполковник Қанат Беляков.
Шара аясында түрлі құрылымдар өкілдерімен, оқу орындары шәкірттерімен, әскерге шақырылатын жастағы жастар, тұрғындармен кездесулер өткізіліп, ішкі әскер жауынгерлеріне қойылатын талап-міндеттер, бөлімдердің тыныс-тіршілігі жөнінде айтылды. Тұрғындарға арнап әскери оркестр концерт қойып, ішкі әскерлер туралы деректі фильм көрсетілді.
