Іздеуде жүрген көліктерді сатумен айналысқан депутаттың қылмыстық әрекеті әшкереленді
АСТАНА. Маусымның 24-і. ҚазАқпарат /Арман Асқаров/ - Қаржы полициясы құрамында лауазымды тұлғалар болған ұйымдасқан қылмыстық топтың іс-әрекетін әшкереледі.
Бұл туралы бүгін ҚР Экономикалық қылмыс және сыбайлас жемқорлыққа қарсы күрес агенттігінің ресми өкілі Мұрат Жұманбай мәлім етті, деп хабарлайды ҚазАқпарат.
Оның айтуынша, аталған қылмыстық топтың құрамында Шығыс-Қазақстан облысы «Ауыл» кедендік бекетінің 2 қызметкері, «ТрансГруппСемей» ЖШС-ы және «Суханов и К» брокерлік компаниясының қызметкерлері болған. Топты маслихаттың бұрынғы депутаты басқарған. Олар Ресей Федерациясының аумағында іздеу жарияланған автокөліктерді контрабандалық жолмен әкеліп, Қазақстан жерінде сатқан.
«Сондай-ақ тергеу барысында қылмыстық топ ұйымдастырушысының ұзақ уақыт бойы Қытай Халық Республикасынан тауарларды контрабандалық жолмен Қазақстан арқылы Ресей Федерациясына шығарумен айналысқандығы анықталды», - дейді М.Жұманбай.
