Израиль армиясы ХАМАС-тың екі қолбасшысының көзін жойғанын хабарлады
АСТАНА. KAZINFORM – Израиль әскерилері палестиналық ХАМАС радикалдық қозғалысының екі қолбасшысын мерт қылған. Бұл туралы армияның баспасөз қызметі хабарлады, деп жазады ТАСС.
– Кейінгі бірнеше күнде Израиль қорғаныс күштері (ЦАХАЛ) мен Жалпы қауіпсіздік қызметі (ШАБАК) ХАМАС-тың әскери мүмкіндіктерін әлсірету және еврей мемлекеті мен оның әскери қызметкерлеріне төнген қауіп-қатерді жою мақсатында Газа секторының бүкіл аумағында лаңкестік нысандар мен содырларға қарсы соққылар жасады. Бұл жарылыстар кезінде «Газа» бригадасы қолбасшысының орынбасары Ахмед Шимали қаза тапты, - делінген хабарда.
Шимали операцияларға, шабуыл стратегиясын жоспарлауға және 2023 жылғы 7 қазанда ХАМАСтың соғыс қимылдарына дайындық кезінде бригада күштерін қалыптастыруға, сондай-ақ соғыс кезінде Газа бригадасының күштерін орналастыруға жауапты болған.
Сондай-ақ, «Шуджаия» батальонының командирі Джамиль Вадияның мерт болғаны туралы ақпарат тарады.
– ЦАХАЛ және ШАБАК Израиль мемлекетіне кез келген қауіпті жою үшін ХАМАС лаңкестік ұйымымен күресті жалғастырады, - делінген армияның баспасөз қызметі таратқан хабарламада.
Айта кетейік, ХАМАС саяси бюросының мүшесі Салах әл-Бардавил Израильдің Газа секторындағы Хан-Юнис қаласына жасаған әуе соққысынан қаза тапқан еді.
