Израиль Бейруттің оңтүстігіндегі аймаққа соққы жасады

АСТАНА. KAZINFORM – Израиль әскерилерінің мәлімдеуінше, олар Бейруттің оңтүстік шетіндегі аймаққа соққы беріп, «Хезболла» содырын нысанаға алған, деп хабарлайды ВВС. 

- Соққы нысанасы жақында ХАМАС содырларын басқарып, оларға Израильдің бейбіт тұрғындарына қарсы ауқымды және жақын арада болатын лаңкестік әрекетті жоспарлауға көмектескен «Хезболла» лаңкесі болды, - делінген Израиль қорғаныс армиясы мен Шин-Бет қауіпсіздік қызметінің бірлескен мәлімдемесінде.

Әскерилердің мәлімдеуінше, олар «Хезболланың» тірегі саналатын Дахия ауданында содырды жою үшін шаралар қолданып, қауіп-қатерді жойған.

Reuters агенттігінің куәгерлерге сілтеме жасап хабарлауынша, әскери ұшақтар Ливан астанасының үстімен ұшты және қалада күшті жарылыстардың дыбыстары естілген.

Өткен аптада Израиль әскерилері қараша айында атысты тоқтату келісімі күшіне енгеннен бері алғаш рет Бейруттың оңтүстігіне соққы берді. Израиль бұған дейін Ливан аумағынан екі зымыран атылғанын мәлімдеп, «Хезболланы» атысты тоқтату келісімін бұзды деп айыптады.

«Хезболла» жетекшісі Наим Касем әуе шабуылдарын қайта бастауды айыптады. Топ өкілдері сондай-ақ Израиль аумағын атқылауға қатысы барын жоққа шығарды.

Еске сала кетсек, Израиль келісім аясында Ливаннан барлық дерлік әскерін шығарды, бірақ бес позицияда қалдырды. Ливан мұны оккупация деп атады.