Израиль Газада құрлық операциясының басталғанын жариялады, Иерусалимде наразылық білдіріп жатыр
АСТАНА. KAZINFORM – Бір күн бұрын Израиль Газа секторына жаппай әуе соққыларын жасады, деп хабарлайды ВВС.
- Соңғы 24 сағатта ЦАХАЛ әскері қауіпсіздік аймағын кеңейту және Газа секторының солтүстік және оңтүстік бөліктерін ішінара бөлу мақсатында Газаның орталық және оңтүстігінде нысаналы құрлық операцияларын бастады, - делінген ЦАХАЛ мәлімдемесінде.
Израиль әскерінің хабарлауынша, осы операциялар аясында Израиль қорғаныс армиясы Газа секторын екі бөлікке бөлетін Нецарим дәлізінің орталық бөлігіндегі бақылауды күшейтті. Израиль әскері одан атысты тоқтату келісімінің бірінші кезеңінде және ХАМАС ұстаған кепілге алынғандарды босату кезінде шегінді.
Атысты тоқтатудың екінші кезеңі күшіне енген жоқ, келіссөз нәтиже бермеді.
Сәрсенбі күні Иерусалимде мыңдаған адам Кнессет ғимаратынан премьер-министр Биньямин Нетаньяху резиденциясына дейін шеруге шығып, Израильдің Газа секторына қайта соққы беруіне және үкіметтің ел ішіндегі әрекеттеріне наразылық білдірді. Бұл – соңғы кезде үкіметке қарсы ең ірі шерулердің бірі.
Шеру бастапқыда Нетаньяхудың ШАБАК Жалпы қауіпсіздік қызметінің (сондай-ақ «Шин-Бет» ретінде белгілі) басшысы Ронен Барды жұмыстан шығару әрекетіне жауап ретінде жоспарланған болатын.
Израиль Газа секторын бомбалауды қайта бастаған кезде сейсенбіде наразылық шерулеріне шақыру күшейе түсті. Шеруге ХАМАС ұстап отырған кепілге алынғандардың отбасылары қосылды. Олар қазіргі жағдайда содырлар кепілге алынғандарды өлтіреді деп қауіптеніп, үкіметтің Газаға әскери қысым жасауды жалғастыру туралы шешімін сынап отыр.
Израильдің шамалауынша, бұл топтың қолында 59 израильдік қалып отыр, оның 24-і әлі тірі саналады.
Коалицияның ыдырау қаупі
Наразылық білдірушілер биліктен кепілге алынғандардың тағдырын өздерінің саяси аман қалуынан жоғары қоюды талап етіп отыр.
Кейбір шерушілер Тель-Авивті Иерусалиммен байланыстыратын Израильдің басты тасжолының бойында «Коалицияның болашағы немесе Израильдің болашағы» деген жазуы бар баннерлерді ұстап тұр.
- Біздің премьер-министр жанын сатып жатқанда, біз жақын адамдарымызды құрбан етіп жатырмыз, - деді тілшілерге «Сапалы үкімет үшін қозғалыс» құқық қорғау ұйымының төрағасы Элиас Шрага сәрсенбіде өз жақтастарымен бірге Кнессет ғимаратына келгенде.
Осы арада Беньямин Нетаньяху бітімгершілікті тоқтату туралы шешімін соңғы апталарда ХАМАС-тың кепілге алынғандарды қайтару жөніндегі бірқатар ұсынысты қабылдамауымен түсіндіріп отыр. Премьер-министрдің айтуынша, оларды тек күшпен қайтаруға болатынын айтты.
Бір күн бұрын халыққа арнаған теледидарлық үндеуінде ол үкімет бұрын қойылған екі мақсатты жүзеге асыруға қайта оралу туралы шешім қабылдағанын хабарлады: кепілге алынғандарды ЦАХАЛ күшімен босату және ХАМАС-ты толығымен жою.
Бұған дейін ХАМАС өкілі Израиль 19 қаңтарда атысты тоқтату келісімі басталғаннан бері Газа секторына ең қарқынды соққыларын бергеннен кейін келіссөздер үшін есік жаппағанын хабарлаған.
Осыған дейін Нетаньяху бұдан былай ХАМАС-пен келіссөздер тек оқ астында жүргізілетінін мәлімдегенін жазған болатынбыз.
