Jüregımnıñ Jeñımpazy: Астанада донорлықты қолдауға арналған жүгіру-фестивалі өтеді

АСТАНА. KAZINFORM – 10 тамыз, жексенбі күні таңғы 5:30-дан бастап ЭКСПО аумағында «Jüregımnıñ Jeñımpazy» жүгіру-фестиваліне қатысу үшін 5000-нан астам адам жиналады. Іс-шара ағза трансплантациясын күтіп жүрген пациенттерге қолдау көрсету мақсатында өтеді, деп хабарлайды Астана қаласы әкімдігінің ресми сайты.

«Бұл жай ғана спорттық шара емес, донорлық тақырыбына деген қоғам көзқарасын өзгертетін бастама», – дейді жүгіруді ұйымдастырушылар – Heart Center Foundation қоғамдық қоры.

Фестиваль 5:30-дан бастап жұмысын бастайды, ал жүгіру 7:00-де басталады.

Қатысушылар үшін жанды музыка, зумба, флешмоб, фудкорт, жәрмеңке, шеберлік сабақтары және сыйлықтар ұтысы ұйымдастырылады.

Хэдлайнерлер – KOBA және Дастан Оразбеков.

Фестиваль қалашығы ЭКСПО аумағындағы Қазақстан Тәуелсіздігінің 25 жылдығына арналған монумент маңында орналасады.

Таңғы 5:30-да қалаған барлық адам жүгіруге дайындалу және күні бойы қуат алу үшін йога бойынша таңғы шеберлік сабағына қатыса алады.

Жүгіру басталуы ұйымдастырушылардың құттықтау сөзінен кейін сағат 7:00-ге жоспарланған. 

Барлығы үш қашықтық ұсынылады – 10 км, 3 км және 1 км.

Тіркелу үшін мынау сілтемеге өту керек.

Айта кетейік, елімізде жүз адамға донорлық жүрек қойылды.