Канадада 28 сәуірде мерзімінен бұрын парламенттік сайлау өтеді

АСТАНА. KAZINFORM — Канаданың премьер-министрі Марк Карни 28 сәуірде мерзімінен бұрын парламенттік сайлау өткізілетінін жариялады, деп хабарлайды ТАСС.

— Мен жаңа ғана Канада генерал-губернаторы Мэри Саймонға парламентті таратып, 28 сәуірге сайлау күнін белгілеуді өтіндім. Ол келісті, — деді Карни ұлттық телеарналарда таратылған арнайы үндеуінде.

Премьер-министр мерзімінен бұрын сайлау өткізу туралы шешім ел экономикасындағы проблемаларды қысқа мерзімде шешу және Америка әкімшілігінің тарифтік саясатына жауап беру қажеттілігінен туындағанын түсіндірді. Ол үшін оған және оның үкіметіне халықтың «мықты қолдауы» қажет, деп қосты Карни.

Ел Парламенті 24 наурызда жұмысқа қайта кірісуі керек еді, ал кезекті сайлау 20 қазанға жоспарланған болатын. 9 наурызда Джастин Трюдо Канаданың үкімет басшысы және басқарушы либералды партиясының жетекшісі қызметінен кеткеннен кейін Карни премьер-министр болып тағайындалған еді. Осы уақытқа дейін жұршылық жаңа премьер-министр мерзімінен бұрын сайлау өткізілетінін жариялайды деп күтті, өйткені парламент 24 наурызда Карнидің сенім вотумын қарастыруы керек болатын. Бұл ретте Парламентте либералдардың аз екенін және барлық оппозициялық партиялар жетекшілері либералдарды қолдамайтынын мәлімдегендіктен, Карнидің сенім вотумы бойынша дауыс беруден сәтті өту мүмкіндігі болмайтын еді.

СВС телеарнасының мәліметі бойынша Карнидің қазіргі сенім рейтингі 37,7% шамасында, ал оның Канада оппозициялық консервативті партиясынан басты қарсыласы Пьер Пуальеврдің рейтингі 37,4% деңгейінде.

Осыдан бұрын Канада премьер-министрі Джастин Трюдо отставкаға кететінін жариялайтыны анықталды.