Қар аралас жаңбыр: Алматы коммуналдық қызметі күшейтілген режимде жұмыс істейді

АЛМАТЫ. KAZINFORM — Алматы тұрғындарына жауын-шашынға байланысты ескерту жасалды.

Қала әкімдігінің мәліметінше, Алматыда 26 ақпан күні таңертең жаңбыр жауып, кешке жауын-шашын қарға ұласады деп болжанған. Осыған байланысты қаланың коммуналдық қызметтері күшейтілген режимдегі жұмысқа ауыстырылады және жол жұмысшыларының тәулік бойы кезекшіліктері ұйымдастырылады.

— Қар жауа бастағанға дейін көктайғақтың алдын алу мақсатында 204 құм таратқыштың кезекшілігі ұйымдастырылатын болады. Алдын ала қар жауар алдында негізгі магистральдық көшелерді сұйық реагенттермен өңдеу жоспарланған. Тәулік бойы 624 бірлік арнайы техника мен 1380 жол жұмысшысын тартылады, — деп хабарлады әкімдіктен.

Бұдан басқа, жолдардың қауіпті учаскелерінде, жол айрықтарында мұз қатудың алдын алу және жою үшін 46 жедел бригаданың күшімен жол жамылғысының жай-күйін қадағалау жөніндегі жұмыс күшейтілетін болады. Аудан әкімдіктерінде жұмыс өндірісін бақылау бойынша тәулік бойы кезекшілік ұйымдастырылады.

— Көлік жүргізу тәжірибесі аз адамдар автокөлікпен жүруден бас тартып, қоғамдық көлікке ауысқандары дұрыс. Жаяу жүргіншілер тротуарларда жүру кезінде сақтық шараларын сақтауы керек, — деп ескертеді әкімдіктен.

Еске салайық, бұған дейін Алматының кейбір аудандарында көлік қозғалысы шектелуі мүмкін екенін жазғанбыз.