Қарағанды облысында сотталғандар жұмысқа орналасу мүмкіндігіне ие болды
ҚАРАҒАНДЫ. KAZINFORM — Өңірде жұмыспен қамту арқылы әлеуметтік бейімдеудің жаңа моделі іске қосылып жатыр. Жоба бизнес пен мемлекеттік құрылымдарды біріктіріп, сотталған азаматтарға қалыпты өмірге қайта оралу үшін нақты жағдайлар ұсынып отыр.
Қарағанды облысында өнеркәсіптік кәсіпорын базасында сотталғандарды еңбек арқылы қайта әлеуметтендіруге бағытталған пилоттық жоба жүзеге асырылуда. Бұл бастамаға Qarmet компаниясы тартылып, еңбек пен әлеуметтік бейімделу арқылы жазасын өтеп жатқан адамдарды толыққанды өмірге қайтаруға бағытталған өңірлік деңгейдегі алғашқы жүйелі шешімдердің бірі ретінде қарастырылып отыр.
Жоба Қарағанды облысы және Ұлытау облысы бойынша Қылмыстық-атқару жүйесі департаментімен, сондай-ақ өңір прокуратурасы мен Қарағанды облысы әкімдігінің қатысуымен іске асырылуда. Мұндай ведомствоаралық ынтымақтастық форматы қайталанатын қылмыстың алдын алу мәселесін кешенді түрде шешуге мүмкіндік беріп, тұрақты қайта әлеуметтендірудің негізгі факторы ретінде жұмыспен қамтуға басымдық береді.
Қарағанды облысы прокуратурасының мамандандырылған прокуроры Сұлтан Бәкіровтің айтуынша, бұл бастама Мемлекет басшысы деңгейінде берілген тапсырмалармен тікелей байланысты.
— Мемлекет басшысы Қасым-Жомарт Тоқаев 2025 жылғы Үкіметтің кеңейтілген отырысында сотталғандарды қайта әлеуметтендіру және олардың еңбекпен қамтылуын арттыру бойынша қосымша шаралар қабылдауды тапсырды. Қарағанды облысы прокуратурасының қолдауымен, қылмыстық-атқару жүйесі органдарымен бірлесіп Qarmet компаниясының алаңында тұру, тамақтану және еңбекақы төлеу жағдайлары қарастырылған қосымша жұмыс орындары құрылды. Жұмысқа орналасқан сотталғандар мұндай жағдайлардың бейімделу үшін маңыздылығын атап өтті, — деді Қарағанды облысы прокуратурасының мамандандырылған прокуроры Сұлтан Бәкіров.
Жобаға жеңіл және орташа ауырлықтағы қылмыс жасаған сотталғандар тартылған. Бастапқы кезеңде олар өнеркәсіптік комбинат аумағының санитарлық жағдайын қамтамасыз ету жұмыстарына, сондай-ақ әртүрлі қосалқы міндеттерді орындауға жұмылдырылып жатыр.
Мамандардың бағалауынша, еңбек процесіне қатысу сотталғандарда тәртіп, жауапкершілік және ұжыммен жұмыс істеу дағдыларын қалыптастыруға ықпал ететін шешуші фактор.
Тәжірибе көрсеткендей, тұрақты табыс пен нақты жұмыс кестесінің болуы қатысушыларға түзету мекемелерінен тыс өмір жағдайларына біртіндеп бейімделуге мүмкіндік береді. Бұл әлеуметтік оқшаулану қаупін азайтып, босатылғаннан кейін заңға бағынатын өмірге оралуға негіз қалыптастырады.
Бастамаға қатысушылардың өздері де оның маңызын атап өтіп, мұндай жағдайлар өмірлік құндылықтарды қайта саралауға және болашаққа жоспар құруға мүмкіндік беретінін айтады.
— Бұрын бәрі сұр әрі бірсарынды болатын, өмірді қалай жалғастыру керектігі түсініксіз еді. Бүгін Qarmet компаниясының арқасында болашаққа деген сенім пайда болды. Оның маңызын сөзбен жеткізу қиын. Мен үшін бұл — қалыпты өмірге оралып, адал еңбекпен табыс табуға берілген нақты мүмкіндік, — деді бастамаға қатысушы Асылжан Ерзатов.
Қазіргі уақытта жоба пилоттық модель ретінде қарастырылып отыр, алайда алдағы уақытта оны кеңейту жоспарланған. Қатысушылар мен сарапшылардың бағалауынша, мұндай тәжірибені енгізу қайталанатын қылмыс деңгейін айтарлықтай төмендетіп, сотталғандарға әлеуметтік интеграцияның нақты тетіктерін ұсына алады.
Осылайша, жұмыспен қамтуға басымдық беру және тұрғылықты орын, тамақтану мен тұрақты еңбекақы сияқты базалық жағдайларды жасау тек әлеуметтік қолдау құралы ғана емес, сонымен бірге адамдардың өмірін қайта бастауына мүмкіндік беретін құқықбұзушылықтың алдын алудың тиімді механизміне айналып отыр.
