Қарағандыда ауа райының қолайсыздығынан 200-ден аса көлік жолда тұрып қалды

ҚАРАҒАНДЫ. KAZINFORM — Қарағанды облысында ауа райының қолайсыздығына байланысты үш бағыттағы жолдар жабылды. Салдарынан облыстың тас жолдарында 200-ден аса көлік тұрып қалды.

Қарағанды облысында бұрқасынға байланысты сағат 8:40–тан бастап Қарағанды — Астана, Қарағанды — Павлодар және Қарағанды — Балқаш бағыттары бойынша жолдар жабылды.

Таңертеңнен 17:00–ге дейін трассаларда 200-ден астам автокөлік кептеліп қалды.

Облыстың жол полициясы мен ТЖД қызметкерлері көлік құралдарының басым бөлігін Қарағандыға қайта жібереді.

— Құрметті Қарағанды облысының тұрғындары мен қонақтары ауа райының нашарлауына: жел, боран, жолдың дұрыс көрінбеуіне байланысты қазіргі уақытта Теміртау қаласы — Ақмола облысы, Қарағанды қаласы — Ақсу-Аюлы және Қарағанды қаласы — Павлодар облысының шекарасы бағыттарындағы республикалық маңызы бар трассалар жабылды. Қазіргі уақытта жолдарда 200-ден астам көлік бар. Полиция департаменті алыс жол жүруден бас тартуды сұрайды, — деп хабарлады Қарағанды облысының ПД бастығының бірінші орынбасары Жасқайрат Қайыров.

Облыстық полиция департаменті бастығының орынбасары атап өткендей, жолдың ашылуы 14 ақпанда таңғы сағат 08:00–ге жоспарланған.

Осыған дейін ауа райына байланысты жабылған жолдар тізімі жарияланған болатын.