Қарағандыдағы апатты жағдайдағы ЖЭО-3 олигарх Дінмұхамед Ыдырысовқа тиесілі

Бүгін таңертең апат болып, салдарынан қаланың үлкен аумағы жылусыз қалған Қарағанды ЖЭО-3 олигарх Дінмұхамед Ыдырысовқа тиесілі екені белгілі болды, деп хабарлайды ҚазАқпарат тілшісі.

Бұл туралы ҚазАқпарат тілшісіне ҚР Энергетика министрлігі хабарлады.

- ЖЭО-3 «Қарағанды -Энергоцентр» ЖШС-не тиесілі. Қазақстан коммуналдық жүйелер акционері – Ыдырысов Д.А. – деп түсіндірді департаменттен.

Қарағанды ЖЭО-3-тің бас компаниясы - «Қарағанды -Энергоцентр» ЖШС. Өз кезегінде «Қарағанды-Энергоцентр» ЖШС «Қазақстан коммуналдық жүйелері» ЖШС құрамына кіреді. Қазақстан коммуналдық жүйелер акционері - олигарх Дінмұхамет Ыдырысов.

Д.Ыдырысов 2023 жылдың мамырында Қазақстандағы ең бай 50 кәсіпкердің тізіміне енді. 2022 жылы оның есімі Forbes нұсқасы бойынша Қазақстандағы ең ықпалды 50 бизнесменнің тізіміне кірді. Оның табысы - $490 000 000. Ол «Қазақстан коммуналдық жүйелері» ЖШС иелік етеді. «Құрмет», «Парасат» ордендерімен марапатталған.

Д.Ыдырысов еңбек жолын Қазақ КСР Автомобиль көлігі министрлігінің 1-ЖЭУ басқармасының бригадирі болып бастады, кейін «Ordabasy Group» ЖШС бақылау кеңесінің төрағасы және «Қазақстан коммуналдық жүйелері» ЖШС бақылау кеңесінің төрағасы болды.

«Қазақстан коммуналдық жүйелері» кәсіпорны өңірлік деңгейде 4 облыс – Қарағанды, Түркістан, Шығыс Қазақстан және Маңғыстау облысында қызмет көрсетеді. «ККС» ЖШС екі өндіруші ұйымға - «Қарағанды-Энергоцентр» ЖШС және «Өскемен ЖЭС» ЖШС, үш ірі электр желілері компаниясына - «Қарағанды Жарық» ЖШС, «Оңтүстік Жарық Транзит» ЖШС және «Маңғыстау электр желілерін тарату компаниясы» АҚ, сондай-ақ үш өткізу компаниясына «ҚарағандыЖылуСбыт» ЖШС, «Есептік қызмет көрсету орталығы» ЖШС, «Энергопоток» ЖШС.

«Қазақстан коммуналдық жүйелері» компаниясының сайтында жабдықты жаңғырту және қайта құру, сондай-ақ Қарағанды ЖЭО-3 қуатын кеңейту «Қазақстан коммуналдық жүйелердің» ірі жобалары екені айтылған.

Олай болғанымен, бүгін Қарағанды облысының бас шаһарында абоненттердің басым дені жарықсыз қалған болатын.

Өңір әкімі Ермағанбет Бөлекбаев тұрғындарға мәлімдеме жасап, жағдайды түсіндірді.

Кейін Энергетика министрлігі шаһарда қуат беру қалпына келтірілгенін мәлім етті.

Айта кетейік, кеше ғана қарағандылықтар нөсер жаңбыр салдарынан әбігерге түскен еді.