Қарағанды облысында су тасқынынан зардап шеккен Батыс Қазақстан тұрғындарына көмек көрсету жөніндегі қоғамдық штаб құрылды

«Штаб өз жұмысын бастады. Қарағандылықтар көмек көрсету туралы үндеуге белсенді үн қатып отыр, - дейді осынау штабтың жетекшісі, Қарағанды облыстық мәслихатының депутаты Төлеген Әшімов. - Құрылыс материалдарымен, киім-кешекпен, азық-түлікпен көмек көрсету туралы көп ұсыныстар түсуде».

Т.Әшімовтың айтуынша, қарағандылық кәсіпкерлер ақшалай көмек те аударуда. Бизнесмендер 1 миллион теңгедей сома аударып отыр. Өңірге танымал «Айхан» шаруа қожалығы Батыс Қазақстанға 60 тонна картоп жөнелтуде», деп хабарлады штаб басшысы.

Қарағандылық кәсіпорындар мен ұйымдар көмек қорына сондай-ақ біркүндік жалақыларын аударып отыр. «Батыс Қазақстандағы жағдайды ести сала, біздің команда жиналыс өткізіп, көмек көрсету туралы шешім қабылдады. Біз біркүндік жалақыларымызды көмек қорына аудардық, Мұндай жағдай кез-келгеніміздің басымызға түсуі мүмкін. Сондықтан да, отандастарымызға көмек қолын созу - баршамыздың борышымыз», дейді «Шахтер» футбол командасының капитаны Андрей Финонченко.

Төтенше жағдайлар департаментінің хабарлауынша, сондай-ақ Мемлекеттік материалдық резервтің Қарағанды филиалының қоймаларынан Батыс Қазақстанға екі вагон гуманитарлық көмек, атап айтқанда 66 600 банка бұқтырылған сиыр еті, 2700 келі шай, 1000 жылы көрпе жөнелтілді.