Қарағандыда 509 көп қабатты үйдің тұрғындары жылусыз отыр
ҚАРАҒАНДЫ. ҚазАқпарат - Қарағандыдағы 509 көп қабатты тұрғын үйге жылу берілмей отыр, деп хабарлайды «ҚазАқпарат» ХАА тілшісі.
Соның ішінде 47 көп қабатты үйге жылудың берілмеуіне ПИК айыпты болып отыр.
«Қарағандыда 1 797 үйге жылу берілген. Бұл 78 пайыз деген сөз. 509 үйге түрлі себептермен жылу берілмей отыр. Соның 300-іне жылудың берілуі жылу магистралдарындағы жөндеу жұмыстарына байланысты кешіктірілуде», - дейді әкімдік баспасөз қызметіндегілер облыстық энергетика және тұрғын үй-коммуналдық шаруашылық басқармасының басшысы Қайрат Бегімовке сілтеме жасап.
Облыстың солтүстік бөліктерінде жылу маусымы ресми түрде 1 қазаннан басталды. Оңтүстік бөліктерінде қазанның 5-і мен 15-і аралығында жылу беріледі. «Облыс оңтүстігінде күндіз ауа температурасы 13-14 градус нөлден жоғары болып отыр», - деді Қайрат Бегімов.
Оның айтуынша, бүгінгі таңда облыстағы 3 170 көп қабатты үйге, яғни 47 % жылу берілген. Жылу берілген әлеуметтік нысандардың саны - 398.
