Қарағандыда алғашқы ауыл шаруашылығы жәрмеңкесіне 54 тонна ет әкелінді
ҚАРАҒАНДЫ. ҚазАқпарат - Қарағандыда дәстүрлі күзгі ауыл шаруашылығы жәрмеңкесі басталды. Онда өңірдің ауыл шаруашылығы өнімдері сатылады. Бұл туралы облыс әкімінің баспасөз қызметі хабарлады.
«Жәрмеңке ел Президентінің азық-түлік өнімдеріне бағаны тұрақтандыру және тұрғындарға, әсіресе аз қамтылған азаматтар мен зейнеткерлерге әлеуметтік қолдау көрсету тапсырмасын орындау үшін өткізілуде. Бұл қазіргі белең алған экономикалық дағдарыс уақытында аса маңызды», - деді облыс әкімі Н. Әбдібеков сенбі күні өткен жәрмеңкенің ашылуында. Бірінші жәрмеңкеге облыстың 9 ауданының өндірушілері қатысты. 70 шатыр орнатылды, баға нарықтық бағадан 15-30 пайызға төмен болады. Ұйымдастырушылардың мәліметінше, 54 тонна ет, 250 мың дана жұмыртқа, 320 тонна картоп, 100 тонна көкөніс әкелінді. Бұдан басқа, қымыз, бауырсақ фестивалі өткізілді.
