Қарағандыда биыл 2,2 мың бейнебақылау камерасы іске қосылады
ҚАРАҒАНДЫ. ҚазАқпарат – Қарағанды облысында «Цифрландыру, ғылым және инновация есебінен технологиялық серпіліс» ұлттық жобасы белсенді жүзеге асып жатыр. Жоба аясында Қарағандыда қалалық жедел басқару орталығына 4 588 бейнебақылау камерасы шығарылды, деп хабарлайды ҚазАқпарат тілшісі.
Ұлттық жоба шеңберінде Қарағанды облысында биыл 2 280 жаңа бейнебақылау камерасын орнату жоспарланған.
Осылайша, аймақ билігі азаматтардың қауіпсіздігін күшейтуге ниетті.
Ақпараттандыру, мемлекеттік қызметтер көрсету және архивтер басқармасының басшысы Рустам Байжанов хабарлағандай, бүгін Қарағанды аумағында жедел басқару орталығына 4588 бейнебақылау камерасы шығарылды.
Облыс орталығындағы үйлердің кіреберісіне 1550 камера орнатылған.
Өңірде «Бұлтты бейнебақылау» және «Қауіпсіз қала» жобалары жұмыс істейді.
Қарағанды қиылыстарында нақты уақыт режимінде жол ережесін бұзу фактілерін 10 аппараттық-бағдарламалық кешен тіркейді.
Қарағандыда кез келген азамат пайдалана алатын шұғыл байланыс терминалдары да бар.
Бүкіл полиция қызметкерлері планшеттермен қамтамасыз етілген. Облыста жабдықты жаңарту үшін қосымша сатып алу жоспарланған.
