Қарашығанақ кен орнында газ өңдеу зауытының құрылысына кірісу қажет - Н. Назарбаев
АСТАНА. 27 қаңтар. ҚазАқпарат /Руслан Ғаббасов/ - Қарашығанақ кен орнында газ өңдеу зауытының құрылысына кірісу қажет.
Бұл туралы бүгін ҚР Президенті Нұрсұлтан Назарбаев ҚР Парламенті палаталарының бірлескен отырысында Қазақстан халқына арналған жыл сайынғы дәстүрлі Жолдауында мәлім етті.
«Жылына 5 млрд. текше метр қуаттылығы бар Қарашығанақ кен орнында газ өңдеу зауытын жобалауды аяқтап, оның құрылысына кірісу қажет», - деп тапсырды Мемлекет басшысы.
Мұнымен қоса, Елбасы құны 6,3 млрд. АҚШ доллары көлеміндегі Атырау газ-химиялық кешеннің жобалық қуатын енгізуді қамтамасыз етуді атап өтті.
Сонымен қатар Президент Үкіметке еліміздің орталық өңірін, оның ішінде Астананы газбен қамтасыз ету тұрғысында газ құбыры жүйесін жобалап, жүзеге асыруды тапсырды.
