Қаржылық «сауықтырудың» банкроттықтан артықшылығы қандай

АСТАНА. ҚазАқпарат – Проблемалық қарызы бар адамдарға «қаржылық сауықтыру» тәсілі қолданылуы мүмкін. «Жеке тұлғалардың банкроттығы туралы» Заң жобасын таныстырған Қаржы вице-министрі Ержан Біржанов орталық коммуникациялар қызметінде өткен брифингіде осындай мәлімет айтты, деп хабарлайды ҚазАқпарат тілшісі.

Жеке тұлғаларды банкрот деп танудың үшінші рәсімі – төлем қабылетін қалпына келтіру. Ол үшін азаматтың тұрақты табысы болу керек. Мұндай жағдайда қарызды төлеу үшін 5 жылға дейін сот тәртібімен бөліп төлеу жоспары қарастырылады. Бұл да қазір заңды тұлғаларға қолданылып жүр. Енді жеке тұлғаларға қолдансақ дейміз, яғни банкроттыққа жеткізбей, сауықтыру шарасын жүргізуге болады

, - деді вице-министр.

Айтуынша, мұндай «сауықтыру» жоспары қаржы менеджерлерімен бірлесіп жасалады да, оны сот бекітеді.

Бұл рәсімнің артықшылығы – кейін адам банкрот деп танылмайды, яғни кейін оның жеке бас деректерінде жағымсыз статус болмайды. Оның тиімділігі осында

, - деді Ержан Біржанов.

Бұған дейін хабарланғанындай, заңды тұлғаларды банкрот деп тану механизмі проблемалық қарызы 4,9 млн теңгеден асқан жеке тұлғаларға да қолданылады.